Anëtarja e Kryesisë së PD, Jorida Tabaku deklaroi se ligji për investimet strategjike është abuziv pasi është në shkelje të hapur me Kushtetutën.
Në një postim në “Facebook”, Tabaku shprehet se ky ligj I dorëzon të gjitha çelsat e pronave kryeministrit Edi Rama.
Ajo e akuzon kryeministrin se përmes këtij veprimi po synon krijimin e një komunizmi.
“Ky ligj dorëzon çelësat e pronave të gjithë Shqipërisë (pa marrë parasysh nëse janë publike apo private) kryetarit të kësaj Korporate, kryeministrit. Dhe ka në thelb një dëshirë për të centralizuar të gjitha mjetet e zhvillimit dhe prodhimit, në pak fjalë ka si synim krijimin e një komunizmi por të një lloji tjetër. Arkitektura me të cilën, djallëzisht, Rama ka vendosur të ndërtojë këtë institucion që nuk është as publik dhe as privat i jep shansin vetëm oligarkëve për të përfituar drejtë për drejtë nga qokat e qeverisë. Sipas draft ligjit të Korporatës së Investimeve Strategjike, që është depozituar në parlament, qeveria i jep të drejtën vetes që të transferojë pronat nën pushtetin lokal pa marrë parasysh autonominë vendore.”
Sipas Tabakut shteti është duke shkelur të gjitha ligjet pasi përmes këtij veprimi prona publike po transferohet tek privati.
“Sakaq kjo do të thotë që prona publike i transferohet pa kushte një personi juridik, subjekt i të drejtës private. Në pak fjalë shteti duke shkelur të gjitha ligjet dhe normat kushtetuese vendos t’i falë një pronë publike një kompanie private, duke anashkaluar ccdo procedurë ligjore. Së dyti, duke qenë se KISH është produkt hibrid, ai transformon edhe logjikën e buxhetit të shtetit. Pasi sipas draft ligjit, Korporata ndonëse nuk është një institucion plotësisht shtetëror, ka të drejtë të marrë fonde edhe nga buxheti i shtetit. Apo ka të drejtë që pronat publike që i merr në inventar sipas asaj që përmendëm më sipër, t’i tjetërsojë apo t’i përdorë si kolateral apo edhe t’i punojë me të ardhruat që do të marrë nga buxheti i shtetit. Duke tjetërsuar një parim kyç të buxhetit të shtetit: mospërdorimin e fondeve buxhetore për shpenzime që nuk janë brenda fushës së shpenzimeve publike. Në pak fjalë, buxheti i shtetit bëhet arka në të cilën kryeministri dhe oligarkët përmes kësaj korporate mund të fusin dorën sa herë që duan pa pyetur askënd dhe pa i dhënë llogari askujt.”
Tabaku thotë më tej se PD ka informuar të gjithë partnerët ndërkombëtarë për këtë çështje ndërsa I bën thirrje qeverisë që të tërhiqet.
