Trajneri i Kombëtares Silvinjo publikoi listën me 24 lojtarë të grumbulluar për dy ndeshjet e radhës në transfertë të Shqipërisë në ligën e kombeve kundër Çekisë dhe Gjeorgjisë. Vihen re disa ndryshime në raport me sfidat e muajit shtator. Është rikthyer në grup Mirlind Daku që kaloi fazën ë pezullimit dhe të dëmtimit, të cilat e lanë jashtë përballjeve me Ukrainën dhe Gjeorgjisë.
Daku do të mbajë peshën në sulm në mungesë të Rei Manajt që është i dëmtuar, ndërsa vazhdon të jetë për arsye dëmtimi edhe Broja. Reparti ofensivë kompletohet me emrat e vjetër Myrto Uzuni, Jasir Asani, Taulant Seferi dhe Arbër Hoxha. Mbetet jashtë Agim Zeka i Partizanit i cili edhe pse u mor në shtator nuk luajti asnjë minutë. Jashtë në mesfushë edhe Sebastian Spahiu që luan në Iran, ndërsa rikthehet Ernest Muçi që nuk është duke kaluar momente të gëzueshme edhe tek Beshiktash, e shpreson të rigjejë buzëqeshjen me kuqezinjtë.
Duke qëndruar në mesfushë, risia më e madhe është grumbullimi për herë të parë i Adrion Pajazati, kapiteni i talentuar i ekipit tonë Shpresa që luan për HNK Gorica në Kroaci. Do të mungojë ndërkohë Medon Berisha mesfushor i Leces, që është i dëmtuar. Pjesa tjetër e mesfushorëve konfirmohet. Në mbrojtje spikat Andi Hadroj i Partizanit, opsioni zëvendësues i Mario Mitaj në të majtë. Hysaj pavarësisht së është jashtë Lacios do të jetë me kombëtaren, sikurse edhe Arlind Ajeti që rikthehet edhe për shkak të formës që po kalon me Bodrumspor në Turqi.
Në listë rezulton edhe Berat Gjimshiti, ndonëse ende duhet vlerësuar gjendja e tij pasi doli i dëmtuar së fundi në Champions League pas një problem në kofshe. Në portë konfirmohen Strakosha, Alen Sherri dhe Elhan Kastrati. Grumbullimi i lojtarëve nis të dielën dhe kompletohet të hënën më 7 tetor kur nis edhe puna e Silvinjos me kuqezinjtë. Të enjten Shqipëria udhëton për në Pragë ku do të luajë në 11 tetor ndaj Çekisë. /vzionplus.tv
