Katër skuadra në një diferencë vetëm 5 pikëshe. Kjo është panorama e kreut të klasifikimit të kampionatit Italian pas zhvillimit të shumicës së ndeshjeve të javës së 15.
Skuadra që ka humbur terren pas kësaj jave është Napoli që u ndal në një barazim 2 me 2 në transfertë nga Sasuolo, skuadër që kishte mundur edhe Milanin pak ditë më parë.
Emocionet më të mëdha të sfidës ishin në pjesën e dytë, fraksion që nisi me dy gola të shpejte të miqve.
Fillimisht shënoi Fabian Ruiz në minutën e 51…dhe 9 minuta më vonë Dris Mertens.
U duk gjithçka e mbyllur por Sasuolo u kthye në lojë në minutën e 72 me një supergol të Skamakes kaq mjaftoi që fundi i sfidës të ishte elektrizues dhe Ferrari me kokë shtangu skuadrën e Spaletit, e cila tanimë është në vendin e parë me 36 pikë, vetëm 1 më shumë sesa Milani.
Kuqezinjtë u rikthyen tek fitorja pas dy humbjesh radhazi. Përtej mungesave të shumta, të cilave iu shtua edhe dëmtimi që në fillim të ndeshjes me Xhenovën edhe i Simen Kjer, kuqezinjtë dolën me kokën lart nga Luixhi Ferraris, duke fituar 3 me 0 kundër skuadrës së Shevchenkos.
Zllatan Ibrahimovic shënoi një gol shumë të bukur nga goditja e dënimit në pjesën e parë.
Ndërsa në të dytën heroi i Milanit ishte Zhunior Messies me dy gola të tjerë që kthyen qetësinë tek skuadra e Piolit.
Sfidat u transmetuan ekskluzivisht në platformën Tring.
