Gjatë kremtimit të Kurban Bajramit në disa vende të botës ka pasur dhe incidente.
Më i rëndi ka qënë në Afganistan ku të paktën 12 raketa janë hedhur në Kabul mëngjesin e kësaj të marte. Disa prej raketave kanë synuar Pallatin Presidencial dhe zonën diplomatike në kryeqytetin e Afganistanit.
Sulmi erdhi ndërsa presidenti Ashraf Ghani po fliste në ceremoninë e faljes së Bajramit.
Zyrtarët afganë thanë se luftimet shpërthyen midis forcave të sigurisë dhe grupeve të armatosura në lagjen e vjetër të qytetit, dhe flitet për të paktën 2 të plagosur.
Presidenti Ashraf Ghani po fliste drejtpërdrejt në televizion për të festuar Kurban Bajramin kur u dëgjuan shpërthime, disa prej tyre pranë pallatit presidencial.
Sulmi vjen pasi talebanët refuzuan ofertën e armëpushimit nga qeveria afgane një ditë më pare, duke thënë se ata do të vazhdonin me sulmet e tyre.
Zona ku goditet raketa është një nga pjesët më të sigurta të Kabulit, ku ndodhen ambasadat dhe ndërtesat e qeverisë afgane.
Askush nuk ka marrë përgjegjësinë për sulmin deri tani, por vjen vetëm dy ditë pasi Ghani shpalli një armëpushim me talebanët përpara festimeve të Bajramit.