Australia u trondit një ditë më parë nga nga një sulm terrorist në plazhin Bondi të Sindeit. 15 persona u vranë, përfshirë një vajzë 10-vjeçare. 38 të tjerë janë plagosur dhe ndodhen në spital, sipas Policisë së Uellsit të Ri Jugor. Viktimat janë të moshës nga 10 deri në 87 vjeç.
Sulmi ndodhi të dielën, ndërsa qindra njerëz ishin mbledhur për të festuar ditën e parë të Hanukkah ( festës së komunitetit hebre ), duke bërë që autoritetet ta përshkruanin masakrën si një akt “terrorist” dhe “antisemit”.
Lexo edhe :
Kryeministri Anthony Albanese njoftoi se flamujt në të gjithë vendin do të valëviteshin në gjysmështizë si shenjë zie.
Babai dhe djali autorët e krimit – 24-vjeçari është në spital
Policia konfirmoi se sulmuesit ishin baba e bir, të moshës 50 dhe 24 vjeç. Shahid Akram, 50 vjeç, u vra në vendngjarje nga oficerët, ndërsa Naveed Akram, 24 vjeç, është në gjendje kritike por të qëndrueshme. Shefi i policisë tha se nuk po kërkoheshin të dyshuar të tjerë.
Sulmuesi 50-vjeçar ishte anëtar i një klubi qitjeje dhe kishte një leje për armëmbajtje me tytë të gjatë. Sipas autoriteteve, ai kishte në posedim gjashtë armë zjarri, të cilat besohet se janë përdorur në sulm. Policia është zotuar të hetojë plotësisht se si janë siguruar dhe përdorur armët.
ABC Australia raporton se flamuj të Shtetit Islamik u gjetën në makinën e përdorur nga dy terroristët të dielën, duke shtuar se oficerët australianë të FBI-së që punojnë në këtë rast besojnë se ata kishin lidhje me ISIS-in.
Mediat ndërkombëtare raportojnë gjithashtu se 24-vjeçari kishte studiuar në Qendrën Islamike Al Murad.
Viktimat
Viktima më e re e sulmit terrorist ishte Matilda 10-vjeçare.
Ish-oficeri i policisë Peter Megger, i cili pas daljes në pension punoi vullnetarisht në Klubin e Rugbit Randwick dhe ndoqi hobin e tij të fotografisë, u vra gjithashtu. Sipas raportimeve, ish-oficeri ishte në plazh në një mision fotografik kur ndodhi sulmi i armatosur.
Tibor Witzen u vra ndërsa përpiqej të mbronte gruan e tij nga të shtënat me armë zjarri. Gruaja mbijetoi.
Eli Schlanger ishte baba i pesë fëmijëve dhe një nga organizatorët e eventit “Hanukah by the Sea” që u vu në shënjestër të personave të armatosur.
Yaakov Levitan, i cili kishte punuar për një organizatë globale të dedikuar për përhapjen e besimit dhe traditave hebraike në të gjithë botën.
Reuben Morrison shërbeu si asistent në sinagogën lokale.
27-vjeçari francez Dan Elkayam, vdekja e të cilit u konfirmua nga ministri i jashtëm francez, ishte zhvendosur në Australi për të punuar si inxhinier rreth një vit më parë.
Kronika e Sulmit – Si vepruan autorët
Incidenti ndodhi pak para orës 18:45 (ora locale), në një kohë veçanërisht të ngarkuar të ditës.
Dëshmitarët thanë se të shtënat në plazh, i cili ishte i mbushur me njerëz, zgjatën rreth 10 minuta dhe qindra njerëz filluan të vraponin në panik në rërë dhe në rrugët dhe parqet aty pranë.
Policia tha se rreth 1,000 njerëz po merrnin pjesë në eventin e Hanukkah.
“Të gjithë u frikësuam dhe filluam të vraponim. Hodhëm gjithçka… shapka, gjithçka. Po vraponim drejt kodrave”, tha banori vendas Marcos Carvalho, 38 vjeç.
“Dëgjuam të shtëna me armë. Ishte tronditëse… 10 minuta të shtëna pa ndërprerje. “Tingëllonte si një armë e fuqishme”, i tha AFP-së Camilo Diaz, një student 25-vjeçar kilian që ishte në vendngjarje./vizionplus.tv
