Dhoma e Avokatisë ka reaguar lidhur me sulmin e dhunshëm kundrejt avokatit Sokol Mëngjesi.
Përmes një deklarate publike, Dhoma e Avokatisë, thotë se është duke ndjekur me shqetësim të madh ecurinë e gjendjes shëndetësore të Sokol Mëngjesit.
Lexo edhe :
Related Posts
Teksa e cilëson sulmin se akt tejet të rëndë kriminal, Dhoma e Avokatisë bën thirrje dhe kërkon nga të gjithë pa përjashtim, të respektojnë e të vlerësojnë me mirënjohje të veçantë rolin dhe kontributin e avokatit në funksionimin cilësor të drejtësisë.
Dhoma e Avokatisë do të përshkallëzojë qëndrimin e saj me qellim mostolerimin e dhunës fizike apo psikike ndaj avokateve, si dhe në mbrojtje të dinjitetit profesional dhe interesave të jetës shëndetit e familjarëve të tyre.
Reagimi i plotë i Dhomës së Avokatisë:
Dhoma e Avokatisë së Shqipërisë, me shqetësim të madh është duke ndjekur në vijimësi ecurinë e gjendjes shëndetësore të kolegut dhe njëkohësisht profesorit të Fakultetit të Drejtësisë, z.Sokol MENGJËSI.
Duke marrë shkas nga ky akt tejet i rëndë kriminal, i cili në analizën e gjithë qëndrimeve është inkurajuar nga denigrimet e vazhdueshme bërë figurës së avokatit, duke filluar që nga vlerësimet e politikës, të administratës shtetërore, të trupës së gjyqtarëve dhe prokurorëve, të disa përfaqësuesve manipulues e keqadashës të medias e të publikut, kanë bërë që të frymëzojnë dhe ushqejnë eksese të tilla kriminale.
Komiteti Drejtues në mbledhjen e tij të ditës së Premte, më 31 Maj 2024, ju bën thirrje dhe kërkon nga të gjithë pa përjashtim, të respektojnë e të vlerësojnë me mirënjohje të veçantë rolin dhe kontributin e avokatit në funksionimin cilësor të drejtësisë.
Dhuna ndaj avokatit është dhunë ndaj drejtësisë, ndaj gjyqtarit, prokurorit, përmbaruesit e noterit. Komiteti Drejtues i Dhomës, për këtë ngjarje të rëndë kriminale, shpreh keqardhjen për mungesën e një qëndrimi apo dënimit të tij, nga trupa e gjyqtarëve dhe prokurorëve, për atë ç’ka i ndodhi kolegut Tonë.
Duhet të bëjmë me dije që ligjvënësi në një nen të veçantë të Kodit Penal, për shkak të rolit dhe veprimtarisë të rëndësishme publike, vë në mbrojtje të cilësuar subjekte të tilla si deputetin, gjyqtarin, prokurorin, avokatin, ushtarakun dhe një sërë subjektesh që ushtrojnë funksione publike.
Dhoma e Avokatisë do të përshkallëzojë qëndrimin e saj me qellim mostolerimin e dhunës fizike apo psikike ndaj avokateve, si dhe në mbrojtje të dinjitetit profesional dhe interesave të jetës shëndetit e familjarëve të tyre.
Me shpresën që vepra të tilla dhune të mos përsëriten urojmë dhe lutemi për shërim sa më të shpejtë dhe të plotë të kolegut Tonë Av. Sokol MENGJËSI.
Komiteti Drejtues gjen rastin të përcjell një vlersim të veçantë për ekipin e mjekëve të talentuar dhe të përkushtuar të cilët, që në kontaktin e parë dhe në vazhdim ndjekin dhe kujdesen për kolegun Tonë.
Gjithashtu, përshëndesim Drejtorinë e Policisë së Shtetit Tiranë, për profesionalizmin e treguar në evidentimin, gjetjen dhe kapjen e autorëve të këtij akti barbar, të cilët duhet të përgjigjen para drejtësisë.
Gjykata e Tiranës la sot në burg Dritan Nanon dhe Dorian Alian dy prej të akuzuarve për dhunën barbare ndaj avokatit Sokol Mëngjesi. Me masën e sigurisë “burg pa afat” Nano dhe Alia u njohën këtë të shtunë, ndërsa janë akuzuar për plagosje të rëndë me dashje, kryer në bashkëpunim ndaj avokatit Mëngjesi.
Të akuzuarit kanë mohuar të jenë organizatorë të sulmit dhe sipas tyre ka qenë diçka rastësore. Gjatë marrjes në pyetje Nano ka thënë se nuk ka gisht në dhunën e ushtruar ndaj Mëngjesit. Ai nuk ka pranuar të bashkëpunojë pavarësisht se mësohet se policia ka prova që përfshijnë si organizator ne ngjarje.
Gjykata ka miratuar edhe kërkesën e prokurorisë për të vendosur si masë sigurie, “Burg pa afat” për Drivald Alian, Elton Kasajn dhe Romario Tabakun, të cilët janë ende në kërkim.
Masa e dhënë nga prokuroria ka zbutur akuzën ndaj të dyshuarve duke rikualifikuar veprën penale nga vrasje të funksionarëve publik e mbetur në tentativë në “plagosje e rëndë me dashje kryer në bashkëpunim dhe kundërshtim dhe goditja e gjyqtarit, kryer në bashkëpunim”.
Ndërkohë gjendja e avokatit Sokol Mëngjesi mbetet kritike. Prej katër ditësh ai ndodhet në intubim në spitalin e Traumës, në gjendje të stabilizuar por pa asnjë ndryshim dhe po monitorohet intensivisht nga stafi mjekësor. Bluzat e bardha konfirmojnë se të hënën nëse gjendja paraqitet stabel, do të tentojnë ta nxjerrin nga intubimi.
/vizionplus.tv/
