Një valë e re sulmesh ruse gjatë natës ndaj Ukrainës vrau dy persona në rajonin juglindor të Zaporizhias dhe plagosi të paktën 17 persona në rajonin jugor të Odesës, thanë zyrtarët ukrainas më 12 shtator.
Forcat Ajrore të Ukrainës thanë se Rusia e sulmoi vendin me raketa balistike dhe raketa lundruese, si dhe me 129 dronë sulmues, përfshirë dronë të tipit Shahed me motor reaktiv. Ata thanë se mbrojtja ajrore ukrainase kishte shkatërruar ose neutralizuar 110 prej tyre.
Forcat Ajrore thanë se sulmet u regjistruan në 20 lokacione në të gjithë vendin, ndërsa rënia e mbetjeve u raportua në katër të tjera. Ato thanë se rajoni i Odesës ishte më i prekuri.
Sulmet ndodhën një ditë pasi sulmet ruse vranë të paktën gjashtë persona në Zaporizhia dhe pjesë të tjera të Ukrainës, ndërsa Moska dhe Kievi kanë shkëmbyer sulme ndaj infrastrukturës logjistike, energjetike dhe infrastrukturës tjetër ekonomike gjatë javëve të fundit.
Në Odesa, të paktën 17 persona, përfshirë një fëmijë pesëmuajsh, u plagosën, sipas zyrtarëve lokalë. Një ndërtesë banimi 25-katëshe u dëmtua, ndërsa apartamentet në katet 21 deri në 23 morën flakë, tha Shërbimi Shtetëror i Emergjencave i Ukrainës. Katet e sipërme u shkatërruan.
Edhe tri ndërtesa të tjera banimi u dëmtuan në Odesa, thanë zyrtarët.
Në qytetin e afërt të Detit të Zi, Çornomorsk, u plagosën pesë persona, përfshirë katër fëmijë, ndërsa një ndërtesë banimi u shkatërrua, tha Shërbimi i Emergjencave. Edhe një tubacion gazi u dëmtua, duke shkaktuar zjarr.
Në rajonin e Zaporizhias, dy persona u vranë dhe 11 u plagosën nga sulmet ruse ndaj qytetit të Zaporizhias dhe zonave përreth, tha guvernatori rajonal Ivan Fedorov në Telegram.
Fedorov tha se forcat ruse kishin kryer 1.001 sulme ndaj 45 vendbanimeve në rajon gjatë 24 orëve të mëparshme, duke dëmtuar infrastrukturën, shtëpitë, automjetet dhe ndërtesa të tjera.
Sulmi gjatë natës shkatërroi një shtëpi në Zaporizhia, duke vrarë një grua 64-vjeçare dhe një burrë 37-vjeçar, tha Fedorov. Një grua 59-vjeçare u plagos.
Ministria ruse e Mbrojtjes pretendoi më 12 shtator se forcat ruse kishin goditur uzinën e çelikut Zaporizhstal në Zaporizhia, si dhe kompleksin Interpipe Steel në Dnjepër dhe disa objekte në Kryvyi Rih, përfshirë kompleksin Northern Iron Ore Beneficiation Works.
Ministria tha gjithashtu se forcat e saj kishin goditur gjatë natës dy anije transporti në portin ukrainas të Çornomorskut, në Detin e Zi, sipas agjencisë ruse të lajmeve Interfax.
Pretendimet nuk mund të verifikohen në mënyrë të pavarur.
Sulmet pasuan një sulm vdekjeprurës rus ndaj Zaporizhias më 11 shtator, kur, sipas zyrtarëve ukrainasë, u vra një person. Rusia goditi edhe pjesë të tjera të Ukrainës atë ditë, përfshirë Kievin, ku sulmet ndaj dy pikave të karburantit vranë dy persona dhe plagosën të paktën 12 të tjerë.
Rusia e ka intensifikuar fushatën e saj ajrore kundër Ukrainës gjatë javëve të fundit, përfshirë sulme të përsëritura me dronë më të shpejtë me motorë reaktivë. Sulmet gjithnjë e më shumë kanë goditur objektiva logjistikë dhe ekonomikë, ndërsa luftimet përgjatë vijës së frontit kryesisht kanë ngecur.
Më 10 shtator, sulmet ruse vranë pesë persona në qytetin industrial juglindor Pavlohrad dhe goditën gjithashtu një pikë karburanti në Kiev dhe një objekt për përpunimin e vajit të lulediellit, të operuar nga kompania amerikane Bunge në Dnjepër.
Ukraina godet objektiva ekonomikë dhe industrialë
Ukraina gjithashtu ka intensifikuar sulmet me dronë me rreze të gjatë ndaj objektivave ekonomikë dhe industrialë në Rusi.
Më 12 shtator, dronë ukrainas goditën objekte industriale në rajonin rus të Samaras, raportoi Interfax, duke cituar guvernatorin rajonal Vyacheslav Fedorishchev. Ai nuk specifikoi se cilat objekte ishin shënjestruar apo shkallën e dëmeve.
Ushtria ukrainase tha se kishte goditur uzinën Togliattikauchuk, një nga prodhuesit më të mëdhenj të gomës sintetike në Rusi, në qytetin Togliatti, duke shkaktuar zjarr.
Shtabi i Përgjithshëm i Ukrainës tha se uzina prodhon gomë sintetike dhe aditivë karburanti që përdoren në karburantin për raketat ruse. Pretendimi nuk mund të verifikohej në mënyrë të pavarur.
Kryetari i Togliattit tha se disa ndërtesa banimi ishin dëmtuar dhe një person ishte plagosur.
Ministria ruse e Mbrojtjes tha se gjatë natës kishte rrëzuar 230 dronë ukrainas mbi më shumë se një duzinë rajonesh ruse, si dhe mbi Krimenë, të cilën Rusia e aneksoi ilegalisht në vitin 2014.
Në një sulm tjetër, katër objekte tregtare u përfshinë nga zjarri në qytetin jugor rus Taganrog, thanë zyrtarët lokalë.
