Presidenti i Ukrainës, Volodymyr Zelensky, ka njoftuar sot në 15 janar vendosjen e gjendjes së emergjencës në sektorin energjetik, pas sulmeve të vazhdueshme dhe të koordinuara nga forcat ruse që kanë dëmtuar rëndë rrjetin e energjisë elektrike dhe sistemet e ngrohjes në të gjithë vendin.
Si pasojë e këtyre sulmeve, mijëra familje janë lënë pa energji elektrike dhe ngrohje, ndërkohë që temperaturat e dimrit kanë arritur deri në -19°C, duke krijuar rreziqe serioze për jetën e qytetarëve.
Në kryeqytetin Kiev, qindra ndërtesa dhe blloqe banimi vazhdojnë të jenë të pafurnizuara me ngrohje edhe disa ditë pas një sulmi masiv ndaj infrastrukturës energjetike. Autoritetet lokale kanë angazhuar ekipe të emergjencës që punojnë pa pushim për të rikuperuar rrjetin dhe për të rivendosur furnizimin me energji, ndërsa shteti po rrit gjithashtu importet e energjisë nga vendet fqinje për të përballuar mungesat.
Kryetari i Bashkisë së Kievit, Vitali Klitschko, ka paralajmëruar se situata mbetet jashtëzakonisht kritike, duke theksuar se qyteti po përballet me sfida të mëdha për të mbajtur familjet të ngrohta dhe për të garantuar furnizimin minimal me energji.
Ai ka bërë thirrje për solidaritet dhe për bashkëpunim maksimal mes institucioneve qeveritare dhe operatorëve të energjisë.
