Një sulm i paprecedent kibernetik, ka bërë që një grup hakerësh, të zotërojnë dhe të nxjerrin tashmë në shitje të dhënat e qindra mijëra futbollistëve, të siguruara nëpërmjet aksesit në sistemet e FIFA-s.
Faqja e specializuar “FrenchBreaches”, ka identifikuar në “dark web” një grup i cili ka nxjerr në shitje më shumë se 150 mijë pasaporta dhe dokumente të lidhura me to, të futbollistëve që janë në sistemin e FIFA-s, ashtu si edhe të trajnerëve e drejtuesve të vetë organizatës që drejton futbollin botëror.
Nuk dihet ende se si hakerat kanë arritur të thyejnë sistemin e sigurisë së FIFA-s dhe të vjedhin këto të dhëna, por ato tashmë janë në shitje në rrjet dhe mund të bëhen burim mashtrimesh apo vjedhjesh, pasi të dhënat përfshinë adresa, e-maile, apo edhe të dhënat e bankës së gjithsecilit prej tyre.
Si “reklamë” për këtë sulm kibernetik të realizuar me sukses, ata kanë postuar skedarët me të dhënat individuale të lojtarëve apo klubeve, teksa shfaqen materiale të cilat kanë lidhje me emra si Nejmar, Son, Kang-in, Taremi, apo edhe vetë presidenti i FIFA-s, Xhani Infantino.
“Bëhet fjalë për thyerjen më të madhe të historisë së futbollit”, shkruan vetë grupi që e ka realizuar atë, “ShinyHunters”.
