Vlerësimet e para tregojnë se dëmet e shkaktuara nga Cikloni Harry në Italinë jugore kapërcejnë shifrën e 1 miliard eurove. Në Siçili, dëmet janë vlerësuar fillimisht në 740 milionë euro, por autoritetet parashikojnë që shuma përfundimtare të tejkalojë 1 miliard euro, pasi të përfshihen edhe humbjet ekonomike të bizneseve të prekura. Ndërkohë, në Sardenjë dëmet llogariten në qindra milionë euro.
Guvernatori i Siçilisë, Renato Schifani, bëri të ditur se të dhënat paraprake janë përpiluar nga Departamenti Rajonal i Mbrojtjes Civile. Për përballimin e emergjencës, qeveria rajonale ka akorduar 70 milionë euro ndihmë të menjëhershme, nga të cilat 50 milionë do të shpërndahen menjëherë në zonat e prekura, ndërsa 20 milionë të tjera do të vijnë nga fondet e Asamblesë Rajonale të Siçilisë. Në ishull është shpallur edhe gjendja e emergjencës.
Edhe Sardenja vijon të monitorojë situatën, ndërsa guvernatorja Alessandra Todde konfirmoi se dëmet janë të konsiderueshme dhe kërkojnë mbështetje shtesë. Fenomeni atmosferik preku gjithashtu Kalabrinë, ku dallgët e fuqishme në Detin Jon shkaktuan shkatërrime të mëdha në zonat bregdetare.
Megjithëse nuk raportohet për viktima, cikloni ka dëmtuar infrastrukturën, banesat, objektet tregtare dhe portet. Dallgët e dhunshme kanë fundosur anije dhe kanë tërhequr varka deri në rrugët publike, ndërsa sektori i peshkimit ka pezulluar aktivitetin. Në Siçili, peshkatarët artizanalë po përballen me vështirësi të mëdha, pasi dallgët kanë krijuar një diferencë prej rreth 1.5 metrash mes bregut dhe detit, duke rrezikuar ndërprerjen e punës për muaj të tërë.
Cikloni Harry u shoqërua me erëra deri në 150 km/h dhe dallgë rreth 10 metra të larta. Në Kalabri, autoritetet e mbrojtjes civile raportuan se bregdeti i Detit Jon u godit nga masa uji me fuqi të barabartë me një ndërtesë katërkatëshe.
/vizionplus.tv
