Spanja është vendi i dytë në botë që ka humbur më shumë jetë njerëzish në betejën me covid-19 duke numëruar tashmë 3434 viktima dhe rreth 48 mijë të infektuar. Ne kete faze, ky vend ja ka kaluar edhe Kines.
Autoritetet paralajmërojnë se Spanja po i afrohet kulmit të pandemisë. Spitalet janë në një gjendje kolapsi nga mbingarkesa e pacientëve ndërsa vijojnë të rriten rastet edhe mes personelit mjekësor. Një pistë patinazhi është përdorur si morg i përkohshëm.
Edhe Franca vijon të përballet me shtimin e rasteve duke numëruar 1100 viktima dhe më shumë së 22 mijë të prekur por autorietet thonë se numrat jozyrtarë të të infektuarve janë shumëfish më të lartë.
Gjermania ndërkohë ka regjistruar 164 të vdekur dhe rreth 34 mijë mbartës të sëmundjes. Në të gjithë vendin janë ngritur korona ambulanca për të shtuar testimet kurse Bavaria është mbyllur. Njerëzit mund të dalin vetëm për nevojat thelbësore.
Në Britaninë e Madhe është regjistruar vdekja e dytë tek të të rinjtë, një 21 vjecare e cila nuk vuante nga sëmundje të tjera, e humbi betejën me virusin. Ndërkohë edhe princi Charles ka rezultuar pozitiv ndaj covid-19, ai po qëndron i izoluar në Skoci ndërsa vetëm dy javë më parë ka takuar mbretëreshën Elizabeth.
Studiuesit në Universitetin e Oksfordit kanë dhënë alarmin se gjysma e popullsisë mund të jetë infektuar pasi virusi ka qarkulluar në Britaninë e Madhe që në mes të muajit janar, kohë e mjaftueshme për t’u përhapur gjerësisht.
Ekspertët bëjnë thirrje për shtimin e testimeve në popullatë. Deri më tani, 427 persona kanë vdekur dhe më shumë se 8 mijë janë infektuar me Covid-19.
Edhe në Belgjikë e Zvicër rastet janë shtuar ndjeshëm, po ashtu edhe në vendet e rajonit.
