Shqipëria është përmirësuar ndjeshëm në renditjen e Indeksit të Perceptimit të Korrupsionit, publikuar nga Transparency International.
Vendi ynë është rritur me 5 pikë për vitin 2024, krahasuar me vitin 2023, ndërsa në total numëron 42 pikë, nga 100 që janë maksimalet.
Edhe pse vendet e rajonit mbeten problematike për të ndjekur korrupsionin në nivele të larta apo të zbatojnë integritetin gjyqësor, në vendin tonë vlerësohet puna e gjykatës dhe prokurorisë së posaçme.
“Në Shqipëri , prokuroria dhe gjykatat e specializuara kundër korrupsionit (SPAK) kanë fituar besimin e qytetarëve pasi kanë dënuar ish-ministra, deputetë dhe kryebashkiakë. SPAK vazhdon të hetojë një ish-president, kryeministër dhe zyrtarë të tjerë të lartë publikë.”
Shumica e vendeve në rajon sipas raportit, dështojnë për shkak të ndikimit të qeverisë dhe grupeve të tjera të interesit.
Një përmirësim të ndjeshëm në këtë renditje ka bërë edhe Kosova, e cila është rritur me 11 pikë, duke arritur një total prej 44 pikësh.
Nga ana tjetër, rënie me disa pikë kanë shënuar Maqedonia e Veriut dhe Serbia, ndërsa Mali i Zi vazhdon të qëndrojë njësoj si në vitin 2023.
