Demokrati Bardh Spahia kërkoi dorëheqjen e ministres së Shëndetësisë, Ogerta Manastirliu. Pas një videoje të shpërndarë të shtunën nga vetë ministrja nga brenda spitalit Infektiv, Spahia thotë se qytetarët janë terrorizuar dhe se këto janë lajme të rreme.
“Ministrja e Shëndetësisë duhet te japë dorëheqjen! Ajo ka mashtruar qytetarët përmes pamjeve të rreme, duke i terrorizuar ata. Efekti nuk është aspak sensibilizimi i qytetarëve për të përdorur maskën dhe masat e tjera për distancim social dhe higjenë. Qytetari ka njohur në video gjyshen e tij, të painfektuar nga COVID, që sot e ka në shtëpi, por që Ogerta Manastirliu e paraqet si të shtruar në spitalin COVID. Ogerta Manastirliu duhet të japë dorëheqjen, sepse në vend të mesazheve bashkëpunuese, edukative për qytetarët, mbjell frikë dhe terror me regjinë e rreme makabre të Edi Ramës.”
Më tej, ai ndalet tek detaji ku serumet jepen me shishe uji. Sipas Spahisë, ky është momenti për Prokurorinë e Posaçme të nisë hetimet.
“Shikoni edhe një herë videon e qeverisë. Pamjet tregojnë se serumet jepen në shishe uji. Në këtë nivel të tmerrshëm ka mbërritur shëndetësia falas, që premtoi Edi Rama 7 vjet e gjysëm më parë. Prokuroria e Posaçme duhet të nisë menjeherë hetimin penal për Ministren e Shëndetësisë, që shpërndau një video false për të terrorizuar qytetarët!”
Demokrati u bëri thirrje qytetarëve që të kujdesen për veten.
