Presidenti i Ukrainës, Volodymyr Zelensky, do të takohet sot në Florida me Presidentin e Shteteve të Bashkuara, Donald Trump, në kuadër të raundit të fundit të bisedimeve që synojnë t’i japin fund luftës gati katërvjeçare me Rusinë. Takimi do të zhvillohet në rezidencën e kreut të Shtëpisë së Bardhë në Mar-a-Lago.
Dy liderët pritet të diskutojnë një version të përditësuar të planit të paqes të ndërmjetësuar nga Uashingtoni , i cili ende nuk është mbështetur nga Moska, si dhe propozime specifike për garancitë e sigurisë amerikane për Ukrainën.
Takimi vjen pas bombardimeve intensive ruse ndaj Kievit gjatë fundjavës. Autoritetet ukrainase njoftuan se një sulm prej 10 orësh me raketa dhe dronë vrau dy persona dhe la 32 të tjerë të plagosur. Zelensky i cilësoi sulmet si dëshmi se Moska “nuk dëshiron paqe”, duke shtuar se ato ishin “përgjigjja e Rusisë ndaj përpjekjeve tona diplomatike”.
Kontrolli i Donbasit lindor mbetet një nga pengesat kryesore në negociata. Aktualisht, Rusia kontrollon rreth 75% të rajonit të Donetskut dhe rreth 99% të Luhanskut, të njohura së bashku si Donbas. Zelensky ka sugjeruar së fundmi se krijimi i një “zone të lirë ekonomike” mund të jetë një alternativë e mundshme./vizionplus.tv
