Sali Berisha argumentoi pafajësinë e tij në Gjykatën e Posaçme. Përmes përfaqësuesve të tij ligjor, për togat e zeza, ai parashtroi argumentet kundër Prokurorisë së Posaçme për akuzën e korrupsionit që rëndon ndaj tij për kohën kur ishte kryeministër.
Tre janë shtyllat ku e bazojnë avokatët mbrojtjen.
Berisha nuk mund të vihet nën akuzë sipas tyre për një vendim që është kolegjial. Pra një vendim i Këshillit të Ministrave nuk mund të bëjë me faj një kryeministër, pasi është i përbashkët, po ashtu edhe aktet nuk janë individuale. Kështu SPAK sipas tyre është nën tejkalim kompencash sepse nuk mund të vlerësojë bazën ligjore për VKM-të apo politikat që ndjek një qeveri. Këtë e bën vetëm Gjykata Kushtetuese.
Së dyti në optikën e avokatëve, SPAK e ka pasur qëllim në vetvete të vendosë nën akuzë Sali Berishën.
Kjo sepse sipas tyre në kërkesë prokuroria fillimisht ka gjetur fajtorin dhe më pas fajin, ç’ka do të thotë se ka dështuar për të provuar shkakësinë.
Sipas Klodiana Gjyzarit dhe Genc Gjokutajt që mbrojnë Sali Berishën nuk ka ndonjë fakt që provon ekzistencën e një marrëveshjeje paraprake mes tij dhe ndërtuesit të vënë nën akuzë Fatmir Bektashi për marrjen e një ryshfeti. Nuk ka sesi klienti i tyre të nxirrte aktet nënligjore e më pas të privatizonte kompleksin në favor të dhëndrit të tij.
Së treti, ndjekja penale ka qenë e ndikuar politikisht. Këto pretendime – thonë avokatët – mbështeten në deklarata të kryera nga kryeministri Edi Rama, ambasadorja Yuri Kim dhe ish-zyrtarit amerikan Gabriel Escobar.
Në përfundim mbrojtja kërkoi që të thirret dëshmitar kryeministri aktual i vendit Edi Rama që asokohe ishte kryetari i bashkisë së Tiranës dhe sipas tyre firmosi ndryshimin e destinacionit të ish klubit sportiv Partizani. Po ashtu ata kërkojnë dëshminë e oficerit të policisë gjyqësore që ka hetuar dosjen, Besmir Karanxha pasi pretendonjnë se është aktivist politik i PS-së.
Të bashkëpandehur në proces janë, dhëndri i tij, Jamarbër Malltezi, që sipas SPAK është përfituesi nga privatizimi i ish-kompleksit sportiv, Partizani, Fatmir Bektashi, që ndërtoi 17 pallate mbi këto troje, noterja Andia Pustina dhe shoqëritë Homplane dhe Kontakt.
