Rektori i Universitetit të Mjekësisë në Tiranë, Arben Gjata i dedikoi një postim prekës mjekut Drini Dobi që humbi jetën nga koronavirusi në Itali. Gjata premton se do e përcjellë Dobin deri në aeroportin e fundit, ndërsa kujton kohën që kanë kaluar bashkë.
“Drin, mik i mirë i kohëve të vështira, do të nisesh sot. Do të udhëtosh drejt një toke të panjohur. Drejt të panjohurës që do ta prekim të gjithë një ditë. E unë do të shoqëroj deri në aeroportin e fundit, atje ku do të kalosh kufirin e jetës. Te pelqente shume te fluturoje mik, por sot nisesh në fluturimin e fundit drejt engjëjve! Engjëj të bardhë, engjëj mantel-bardhë! Pse kaq shpejt Drin? Kishe ende shumë për të bërë! Nisemi Drin! Drin, si dikur, kur veç njëri prej nesh kish makinë dhe shoqëronim njëri- tjetrin. Si dikur Drin, kur uleshim mbrëmjeve e flisnim gjatë. Eja Drin, futi valixhet në bagazh. A ke harruar gjë?! A nisemi ?! Pse e ke me dy mendje Drin?! Çfarë ke harruar?! Kthehu, merr atë që ke harruar dhe eja…Të shoh Drin. Ke harruar përqafimin e fundit. Të shoh teksa e merr nga Ersi, Florida dhe Flora. I shtrenjti yt David të vështron gjatë. Dhe ti ngulesh përballë tij dhe harron se je për rrugë Drin. Eja Drin! Erdhi koha për t’u nisur. Sa shumë gjëra kam për të thënë Drin dhe sa pak kohë ka mbetur deri në aeroport. Drin, po i jap ngadalë makinës. Dua që kjo rrugë të zgjasë gjatë. Sa shpejt ikën koha mik. Sa hap e mbyll sytë dhe gjendemi në këtë udhëtim të fundit bashkë. Sa shumë njerëz janë në këtë udhëtim Drin! Janë të gjithë pacientët dhe miqtë e tu.”
Mjeku Arben Gjata premtoi se një ditë do të takohen në botën tjetër me Drini Dobin.
