Të dielën, më 9 nëntor, mbi 334 mijë qytetarë nga pesë bashki të vendit do t’u drejtohen kutive të votimit për të zgjedhur kryetarët e rinj të bashkive Vlorë, Berat, Cërrik, Mat dhe Tepelenë.
Sot, 8 nëntor, vendi ndodhet në heshtje zgjedhore, ndërsa Policia e Shtetit ka vënë në zbatim planin e masave për garantimin e mbarëvajtjes së procesit.
Në terren do të angazhohen 612 efektivë policie dhe automjete, të cilët do të kujdesen për sigurinë në 473 qendra votimi dhe 9 objekte të KZAZ-ve, si dhe për transportin e materialeve zgjedhore. Struktura të posaçme hetimore do të monitorojnë çdo rast që mund të cënojë integritetin e votës, ndërsa policia u bën thirrje qytetarëve të raportojnë çdo tentativë për tjetërsim të saj.
Procesi zhvillohet pas vakancave të krijuara në drejtimin e pesë bashkive, dhe synon rikthimin e përfaqësimit lokal deri në zgjedhjet e ardhshme të planifikuara për pranverën e vitit 2027.
Pesha e elektoratit
Në Vlorë votojnë rreth 172 mijë qytetarë, në Berat mbi 82 mijë, në Cërrik afro 39 mijë, në Mat rreth 29 mijë, ndërsa në Tepelenë mbi 12,600 votues.
Garat elektorale
Në Vlorë, kandidatja e PS-së Brunilda Mersini do të përballet me Dionis Sotën, i mbështetur nga PD, dhe me Gjergj Nikën.
Në Berat, Ervin Ceca (PS) do të ketë përballë Pavlo Shkarpën.
Në Mat, garojnë Altin Bojni (PS), Suzana Pasha si kandidate e pavarur, dhe Eduart Brahilika, i mbështetur nga opozita.
Në Cërrik, përballë kandidatit socialist Florenc Doka do të jenë Amarildo Hoxha (i pavarur, me mbështetje nga PD) dhe Eligert Hima nga “Lëvizja Shqipëria Bëhet”.
Në Tepelenë, kandidati socialist Gramoz Sako sfidohet nga i pavaruri Gabriel Guma, i mbështetur nga opozita.
Kryebashkiakët që do të zgjidhen të dielën do të kenë një mandat njëvjeçar e gjysmë, deri në zgjedhjet e radhës vendore të vitit 2027.
/vizionplus.tv
