I dërguari i posaçëm i Bashkimit Europian për dialogun Kosovë-Serbi vizitoi këtë të mërkurë Prishtinën për takime me udhëheqësit politikë.
Peter Sorensen u prit fillimisht nga kryeministri në detyrë Albin Kurti në ndërtesën e qeverisë. Më pas ai u takua me presidenten Vjosa Osmani.
Lexo edhe :
Related Posts
Në një deklaratë për media, i dërguari europian u shpreh shpresëplotë për vazhdimin e dialogut Kosovë-Serbi.
“Prandaj, po e nisi vitin e ri me një udhëtim pune këtu dhe në Beograd më vonë gjatë javës. Çfarë do të bëjmë ne është të sigurohemi që palët të ulen dhe të bisedojnë. Duhet ta gjejmë një mënyrë që kjo të ndodhë. Shpresojmë që viti 2026 të na sjellë atë që 2025 nuk mundi”, tha Sorensen.
Osmani, ndërkohë, theksoi se dialogu duhet të jetë i përqendruar në njohjen reciproke dhe se suksesi i bisedimeve varet edhe nga trajtimi barabartë i palëve.
“Serbia vazhdimisht ka shkelur marrëveshjen e Brukselit dhe aneksin e Ohrit, duke shkelur sovranitetin dhe integritetin territorial të Kosovës, duke kryer akte agresioni, si dhe duke kundërshtuar anëtarësimin e Kosovës në organizata ndërkombëtare”, njoftoi Presidenca.
Kosova dhe Serbia nuk kanë zhvilluar takim të nivelit të lartë që nga viti 2023, pas rritjes së tensioneve për shkak të sulmit të armatosur në Banjskë.
Kurti i cili pritet të jenë në krye të qeverisë së vendit edhe për një mandat të tretë katërvjeçar, e ka kushtëzuar vazhdimin e dialogut me dorëzimin e të dyshuarit për sulmin në terrorist, Millan Radoiçiç.
Ndërkohë, pas takimeve në Prishtinë, Sorensen ka në axhendë ndalesën në | Beograd për takime me udhëheqës të Serbisë.
