Shkollat në Tiranë do të jenë ndër të parat që do të monitorohen me kamera inteligjente, në kuadër të projektit “Smart City”. Ministria e brendshme ka përzgjedhur 20 shkollat e para, 9-vjeçare dhe gjimnaze, të cilat do të jenë në vëzhgim të vazhdueshëm.
Por, eksperti i teknologjisë, Edmond Liçaj i cilëson këto iniciativa si të imponuara dhe jashtë nevojave reale të vendit.
I ftuar në studion e QUO VADIS në Vizion Plus, Liçaj u shpreh se Shqipëria po kthehet në një shtet eksperimental, ku po zbatohen projekte të hartuara jashtë dhe të papërshtatura me realitetin vendas.
Një nga shqetësimet kryesore, sipas tij, lidhet me mbledhjen dhe ruajtjen e të dhënave përmes sistemeve të survejimit, përfshirë edhe në shkolla.
Liçaj kundërshton edhe idenë se këto projekte lidhen me zhvillimin e një “smart city”, duke argumentuar se Shqipëria nuk i ka kushtet për një model të tillë.
Pjesë nga biseda:
Liçaj: Ky nuk është projekt i yni, sepse do të kishte një vizion dhe do të ishte kërkesë e jona. Fakti që na serviren projekte të pakërkuara dhe të hartuara… Shqipëria është kthyer në një shtet eksperimental. Me survejimin e shkollave ata shohin se çfarë ndodh. Ne nuk e duam survejimin për të parë si vriten e dhunohen. Është ngritja e një strukture për sigurinë kombëtare, por jo nga ne.
Borakaj: I referohesh Emirateve? Se fondet vijnë nga andej.
Liçaj: Unë besoj se nuk kanë lidhje, se asnjë arab nuk është pas kësaj gjëje. Na bën përshtypje pse duhet të ruhen të dhëna. Nuk mund të jetë kurrë një i huaj miku im, sidomos në kohë lufte. Me ne si vend është bërë eksperiment gjithmonë. Vjet u bë DPI. Ajo ishte më e rrezikshme se kjo tani. Unë e shoh këtë si vazhdim të atij projekti, sepse në fund të fundit është marrja e të dhënave. Projekte të tilla, ku asnjë shtet evropian apo perëndimor nuk i ka, do të thotë që merret përsipër një faturë e madhe dhe interesa. Kjo s’ka të bëjë vetëm me shkollën, kjo mat ndjeshmërinë. Ne kemi edhe policë dhe psikologë në shkollë. Ne kemi çdo gjë, por problemi është se nuk kemi laboratorë inteligjentë. Çfarë na duhen kamerat inteligjente? Ky nuk është “smart city”. Ky quhet “safe city”. “Smart city” në Tiranë nuk realizohet dot as për 100 vite.
/vizionplus.tv
