Policia britanike ka kontrolluar dy prona të ish-zyrtarit të lartë qeveritar Peter Mandelson, në kuadër të një hetimi për pretendime mbi shkelje të detyrës publike. Mandelson, 72 vjeç, nuk është arrestuar, ndërsa hetimet vijojnë.
Sipas mediave britanike, gjatë kontrolleve në banesën e tij në Camden, në veri të Londrës, efektivët e policisë sekuestruan disa kuti me materiale, ndërsa një tjetër pronë e tij në Wiltshire u monitorua nga forca të shumta policore.
Zëvendëskomisionerja e Policisë Metropolitane, Hayley Sewart, konfirmoi se kontrollet u kryen nga “ekipi i specializuar për krimet qendrore”, duke sqaruar se hetimi lidhet me dyshime për shkelje të detyrës publike. “Ai nuk është arrestuar dhe hetimet janë ende në zhvillim,” tha ajo.
Hetimi vjen në vazhdën e publikimit të dosjeve të Jeffrey Epstein, të cilat kanë nxjerrë në dritë detaje të reja mbi marrëdhënien mes Mandelson dhe financierit të ndjerë amerikan. Sipas këtyre të dhënave, ish-ministri britanik dyshohet se ka ndarë informacione të ndjeshme me Epstein pas krizës financiare të vitit 2008. Mandelson ka mohuar çdo shkelje dhe ka shprehur keqardhje për ruajtjen e kontakteve me Epstein, duke u kërkuar falje viktimave të tij.
Ndërkohë, çështja ka vënë nën presion edhe kryeministrin dhe njëkohësisht kryetarin e Partisë Laburiste, Keir Starmer, për publikimin e dokumenteve që lidhen me vlerësimin e Mandelson për emërimin e tij si ambasador i Britanisë së Madhe në SHBA, post nga i cili u shkarkua në shtator.
Starmer ka deklaruar se Mandelson kishte gënjyer për natyrën e marrëdhënies së tij me Epstein përpara se të merrte detyrën në Uashington. Në një letër drejtuar Komitetit të Inteligjencës dhe Sigurisë të Parlamentit, kryeministri bëri të ditur se synon publikimin sa më të shpejtë të dokumenteve, duke theksuar se një pjesë e madhe e materialeve duhet të shqyrtohet paraprakisht për arsye të sigurisë kombëtare dhe marrëdhënieve ndërkombëtare.
Sipas burimeve qeveritare, dokumentet janë në fazat e hershme të verifikimit, përfshijnë mijëra faqe dhe po shqyrtohen në bashkëpunim me policinë, për të shmangur çdo ndikim në hetimin penal ndaj Mandelson.
/vizionplus.tv
