Një 13 vjeçare nga Lipjani dyshohet se është ngacmuar seksualisht nga një arsimtar në shkollën shkollën “Vezir Kolshi” në fshatin Resinoc të kësaj komune. Sipas mediave në Kosovë, idyshuari pas intervistimit nga prokurori është liruar në procedurë të rregullt.
Organet e hetuesisë, kanë konfirmuar se rasti ka të bëjë me ngacmimin seksual të një 13 vjeçarje në shkollën “Vezir Kolshi”, në fshatin Resinovc të Lipjanit.
Rasti që dyshohet të ketë ndodhur me 5 mars të këtij viti, në polici është lajmëruar nga prindi i vajzës.
“Lipjan 05.03.2024-10:20. Ankuesi mashkull kosovar, ka raportuar se viktima femër kosovare është ngacmuar nga i dyshuari mashkull kosovar. Lidhur me rastin, i dyshuari është intervistuar dhe me vendim të prokurorit rasti procedohet në procedurë të rregullt”, thuhet në njoftimin e policisë.
Pavarësisht se i dyshuari u lirua, pasi u pyet për veprën penale “ngacmim seksual”, prokurori i shtetit tashmë ka hapur hetim rast për këtë çështje.
Zëdhënësja e kësaj Prokurorie, Laureta Ulaj deklaroi se janë në pritje të grumbullimit të provave bashkë me kallëzimin penal ndaj të dyshuarit.
“Ju njoftojmë se Prokurori i Shtetit ka iniciuar rast lidhur me këtë çështje. Mbesim në pritje të grumbullimit të provave bashkë me kallëzimin penal për të vepruar tutje konform dispozitave të KPPRK-së”, tha ajo..
Ndërkohë se dje, Drejtoria e Arsimit në Gjilan ka pezulluar nga puna mësimdhënësin i cili dyshohet të ketë ngacmuar nxënësen e tij 16-vjecare me fjalë të pakëndshme për trupin dhe integritetin e saj, por edhe të nënës së saj.
Ai ishte mësimdhënës në Shkollën e Mesme të Lartë te Arteve “Adem Kastrati” në Gjilan.
“Drejtoria e Arsimit në Gjilan, vjen me vendim; I punësuari z. K.Q , i sistemuar në vendin e punës si mësimdhënes në Shkollën e Mesme te Lartë te Arteve “Adem Kastrati” në Gjilan, PEZULLOHET përkohësisht nga puna. II. I punësuari si shkelës i supozuar, pezullohet përkohësisht nga puna, duke filluar prej datës 14.03.2024, deri në marrjen e vendimit përfundimtar për konstatimin e përgjegjësisë disiplinore ndaj tij, për shkak të shkeljeve të supozuara të detyrave të punës”, thuhet në përgjigjen e drejtorisë së Arsimit.
Vitin e kaluar gjatë periudhës janar-tetor 2023, në Policinë e Kosovës u raportuan 126 raste të sulmeve dhe ngacmimeve seksuale. /vizionplus.tv
