Sekretari për Çështjet Ligjore në PD, Çlirim Gjata ka akuzuar kryeministrin Edi Rama se po iu jep tre oligarkëve me koncesion një port privat mallrash për të “ngarkuar dhe shkarkuar çdo lloj malli që hyn e del nga Shqipëria”. Sipas tij, kjo është shkelje flagrante e ligjeve dhe e standardeve të sigurisë kombëtare të vendit.

Gjata shprehet se shqiptarët zhyten në varfëri, ndërsa Rama privatizon kufijtë, doganat dhe portet e Shqipërisë duke ua dhënë me koncesion oligarkëve.

“Në mes të krizës së pandemisë, Edi Rama ka braktisur mijëra familje në mjerim, po shtyn biznesin shqiptar dhe ekonominë kombëtare drejt falimentimit. Por Edi Rama nuk ka pushuar asnjë cast pagesat dhe favoret për oligarkët. Pasurimi i oligarkëve është prioriteti i tij i vetëm.  Në kulmin e krizës së vendit, Edi Rama po i jep tre oligarkëve të vendit me koncesion një port privat mallrash për të ngarkuar dhe shkarkuar çdo lloj malli që hyn e del nga Shqipëria.  Në vitin 2015, Edi Rama ju dha tre oligarkëve Shefqet Kastrati, Friden Kuqi dhe Pëllumb Salillari një koncesion të paligjshëm për ndërtimin e një porti karburantesh vetëm pak metra nga porti ekzistues i Porto Ramanos, duke shkelur ligjin. Tani, Edi Rama, me një shtesë të kontratës së koncesionit, ka vendosur që këtë port karburantesh ta kthejë në port për çdo lloj malli të menaxhuar nga këta oligarkë, njësoj si Porti i Durrësit.”

Ai e konsideroi një skandal korruptiv dhe me pasoja të rrezikshme për Shqipërinë. Mes të tjerash , ai shtoi se vendimi për t’iu dhënë oligarkëve këtë koncesion të ri, merret në një kohë kur Rama ka zhytur në papunësi mijëra familje shqiptare.

“Ky port privat për mallrat cenon sigurinë kombëtare të Shqipërisë, dobëson luftën kundër trafiqeve dhe kontrabandës ndërkombëtare, përfshi trafikun e drogës. Porti i oligarkëve rrezikon financat publike dhe mundëson një parajsë të evazionit fiskal. Porti i oligarkëve do të jetë një port për drogën, për kontrabandën, dhe një qendër e krimit. Ky port është privatizim i sovranitetit të Shqipërisë në duart e oligarkëve.”

Leave a Reply

Your email address will not be published. Required fields are marked *