Grupi parlamentar i Partisë Socialiste do të mblidhet të martën për t’u konsultuar për emrin e Presidentit të ri.
Në një lidhje direkte për edicionin qendror të lajmeve në “Vizion Plus”, deputetja socialiste, Anila Denaj tha se secili nga anëtarët e grupit ka mundësinë të propozojë tre emra.
“Neser kemi një mbledhje të grupit parlamentar. Kryetari i grupit, Taulant Balla sqaroi sot në konferencë se secili nga anëtarët e grupit ka mundësinë të propozojë tre emra. Nuk është një votim, kush merr më shumë vota, por është një mënyrë përfshirjeje e gjithë anëtarësisë.”
E pyetur se kush mund të jetë më i favorizuari, Denaj nuk pranoi të jepte një emër. Sipas saj, me rëndësi është që të zgjidhet një person që përfaqëson më së miri rolin e Kreut të Shtetit.
“Të gjithë emrat që lakohen në media, jo domosdoshmërisht janë përfundimtar. Është një proces që nënkupton disa hapa. Është një proces i gjatë. Është dytësore nëse do të jetë grua apo burrë, e rëndësishme të jetë një person i cili personifikon rolin e Presidentit në mënyrën më të mirë të mundshme për të gjithë shqiptarët…Me gjithë respektin për çdo individ, roli i Presidentit duhet të ketë një rol që të ketë eksperiencë me institucionet dhe të njohë ligjet. Mund të jemi të hapur për emra që vijnë jashtë politikës, por jemi të detyruar të pranojmë eksperiencën si bazë për zgjedhjen e një profili të duhur profesional.”
