Kryeministri Edi Rama ka përgëzuar Policinë e Shtetit për vënien në pranga të zjarrvënësve. Duke përgëzuar autoritetet për vënien para përgjegjësisë të autorëve të zjarreve në vend, kryeministri thekson se për të arrestuarit nuk do të ketë tolerancë.
“Një bravo e madhe për Policinë e Shtetit që këtë verë u është qepur këmba-këmbës zjarrvënësve, duke arritur t’i kapë dhe çojë prapa hekurave, si në rastin e kriminelëve që i vunë zjarrin pyllit në Laç, për të cilët përsëris, si për gjithë të arrestuarit e tjerë, apelin në adresë të gjykatësve në rrethe, që të mos vazhdojnë me avazin e tyre të vjetër të mosndëshkimit të një krimi barbar si ky, i cili në Kodin Penal të Republikës së Shqipërisë dënohet deri 15 vjet burg”, thekson ai.
Një falenderim sipas Ramës meriton edhe Agjencia e Mbrojtjes Civile, pasi ka mbrojtur me profesionalizëm pasuritë natyrore.
“Një falënderim i përsëritur për trupat e Agjencisë së Mbrojtjes Civile, e cila e ka rritur ndjeshëm nivelin e performancës gjatë këtij sezoni turistik, duke e mbrojtur me profesionalizëm e shpirt sakrifice pasurinë e paçmueshme natyrore dhe ulur në mënyrë të konsiderueshme dëmet potenciale të këtyre krimeve të neveritshme në verbërinë, shpirtligësinë, marrëzinë e tyre”, nënvizon Rama.
Policia ka identifikuar dhe vënë në pranga disa nga përgjegjësit e zjarreve në vend, mes të cilëve dy adoleshentë që dogjën malin e Partizanit në Berat, si dhe një 41-vjeçar që një ditë më parë i vuri flakën një sipërfaqe me bimësi në LaĻ.
