Kryeministri Edi Rama ka vlerësuar punën e bërë nga Policia e Shtetit në menaxhimin e situatës së zjarreve në vend. Rama thekson se 62 autorë të zjarrvënieve po përballen me pasojat ligjore, ndërsa thekson se nga 79 janë zbardhur 55 raste të zjarrvënieve të qëllimta.
“Policia e Shtetit po bën një punë të admirueshme për zbulimin dhe kapjen e autorëve të krimit të tmerrshëm të zjarrvënies në pyje, ullishta e zona të gjelbërta
Në 79 raste zjarrëvënieje gjatë këtij viti janë zbardhur 55, me 62 autorë të proceduar penalisht”, thotë ai.
Ndërkohë Rama bën përgjegjës për situatën e krijuar, gjykatës e prokurorë, që sipas tij nuk kanë zbatur më herët ligjin ndaj autorëve.
“20 zjarrvënës janë në arrest me burg, ndërsa të tjerët ndiqen në gjendje të lirë, por ende mungon ndëshkueshmëria e plotë, si pasojë e qasjes skandaloze dhe paturpësisht të papërgjegjshme të disa prokurorëve e gjykatësve nëpër rrethe, të cilët mesa duket s’ka atdhe, s’ka fe, s’ka din e as iman, që i frenon në krimin e tyre të indiferencës antiligjore ndaj një krimi si zjarrvënia mbi një pasuri kaq të vyer, që është e të gjithë fëmijëve të Shqipërisë, po edhe e mbarë njerëzimit”, shkruan ai.
Duke përmendur përforcimin e ligjit për këto vepra penale, Rama inkurajon organet e drejtësisë që të veprojnë sipas tyre.
“U bëj apel organeve të inspektimit të drejtësisë dhe mbikqyrjes së veprimtarisë së prokurorëve e gjykatësve, që të mos bëjnë sehir karshi këtyre individëve të padenjë për t’i shërbyer ligjit të Republikës së Shqipërisë.
U bëj gjithashtu apel prokurorëve dhe gjykatësve që kanë në duar rastet e lartpërmendura, që të zbatojnë rreptësisht ligjin dhe t’i dalin për Zot kësaj pasurie të vënë në breza, e cila u takon brezave të ardhshëm, po edhe krejt njerëzimit”, shkruan Rama.
Vendi po përballet me vatra zjarri në zona të ndryshme, ku shumë prej të cilave janë të qëllimta.
