Pavarësisht gëzimit nga çlirimi i vendit dhe rrëzimi i diktaturës, sirianët janë vendosur në udhëkryq për të ardhmen e tyre.
Kjo për shkak të marrëdhënieve të kaluara të rebelëve Hayat Tahrir al-Sham (HTS) me al-Kaedën dhe abuzimeve të të drejtave të njeriut të kryera në zonat ku ata kanë sunduar.
Gjithashtu lideri Abu Mohammed al-Jolani shihet si terrorist nga SHBA dhe aleatët megjithëse në vitet e fundit ai ka hequr dorë publikisht nga lidhjet e tij me Al-Kaedan dhe ka tentuar të paraqitet si një udhëheqës pragmatist e tolerant.
Fuqitë botërore kanë përshëndetur rrëzimin e regjimit të Assadit dhe janë zotuar se do të punojnë për stabilitet në Siri dhe rajonin përreth. Presidenti amerikan, Joe Biden tha nga Shtëpia e Bardhë se do të angazhohet me të gjitha grupet siriane për të krijuar një rrugë tranzicioni drejt një Sirie të pavarur dhe sovrane.
“Regjimi i Assadit ka rënë. Ky regjim ka vrarë mijëra sirianë. Rënia e regjimit është një akt themelor drejtësie. Është një moment mundësie historike për popullin e shumëvuajtur të Sirisë”, tha presidenti amerikan Joe Biden.
Ministri i Jashtëm turk, Hakan Fidan, ka thënë se vendi i tij, i cili i ka mbështetur lëvizjet e rebelëve në Siri, do të ndihmojë në shërimin e plagëve të Sirisë, dhe do t’ia garantojë unitetin, integritetin dhe sigurinë.
Nga ana tjetër, aleatja e Assadit, Moska, ka thënë se trupat ruse në Siri janë në alarm të madh, por që rebelët kanë garantuar sigurinë e bazave të saj ushtarake në këtë shtet.
Pekini ka thënë se është duke parë nga afër zhvillimet në Siri, dhe shpreson që Siria do t’i rikthehet stabilitetit, sa më shpejt që është e mundur. Ministria e Jashtme e Iranit ka thënë se pret që marrëdhëniet “miqësore” me Sirinë, të vazhdojnë.
