Sekretarja për Çështjet Zgjedhore në LSI, Silva Caka deklaroi se në Qarkun e Beratit, gjatë zgjedhjeve, është bërë një masakër dhe se për këtë ka prova.
Në një intervistë për emisionin “7 pa 5” në “Vizion Plus”, me gazetarin Thimi Samarxhiu, Caka tha se mandati i LSI-së në Berat është humbur për shumë pak vota.
“Presim që të zbatohet ligji. Provat janë aty, nuk ka nevojë të bëhet as shkencë, as të shpiket rrota. Pothuajse në të gjitha kutitë e Beratit ka patur problematika, shkelje dhe ka patur tentativa për t’i mbuluar ato. Nga dokumentet dhe pamjet filmike, na rezulton që mandati i LSI në Qarkun e Beratit ndodhet në ato kuti dhe është vjedhur në forma të ndryshme, gjatë numërimit dhe votimit. Ka persona që kanë votuar në qendra të ndryshme votimi. Duhet të kërkojmë pamjet filmike të qendrave të votimit dhe me audio sepse ka pasur edhe problematika të tjera, ka pasur njerëz që kanë tentuar të fotografojnë votën. Në Berat ka problematika të natyrës që nuk kanë qenë të rregullta kutitë që nga ardhja. Sot do të shihni që në Qarkun e Beratit është bërë një masakër e vërtetë. Nuk e di sesi këta njerëz mund të jenë kaq të verbër sa të firmosin dhe pranojnë çdo shkelje. Në Berat është vjedhur për 77 vota, edhe në Durrës, Korçë. Në Gjirokastër është bërë një orkestrim i tërë vetëm që të mos dalë Vangjel Tavo deputet.”
Silva Caka paralajmëroi padi për këdo që ka manipuluar zgjedhjet.
“Një numërues i vetëm nuk ka çfarë të bëjë përpara tre të tjerëve. Për çdo person që ka qenë dhe ka firmosur në tavolina të ndryshme, do të kemi padi për çdo numërues që kanë kryer shkelje të kësaj natyre, duhet të përballet me drejtësinë.”
