Shefja e Departamentit të Sëmundjeve Infektive në Institutin e Shëndetit Publik, Silva Bino sqaroi se pse nuk bëhen publikë emrat e personave aktivë që rrezikojnë të infektojnë edhe të tjerët me koronavirus.
Duke marrë shkas nga fakti se kjo listë është në duart e Policisë së Shtetit, ajo u pyet gjatë edicionit të lajmeve në “Vizion Plus” se pse nuk mund të kenë akses të gjithë qytetarët. Sipas Binos, kjo do të bëhej pengesë për qytetarët e tjerë që të testoheshin për shkak të turpit.
“Kjo do të pengonte pastaj edhe të gjithë qytetarët e tjerë që do të kishin nevojë për testim dhe për tu identifkuar të fshiheshin sepse publikimi i këtyre listave do të kishte një efekt negativ.”
Specialistja bëri me dije se për disa prej rasteve të reja të identifikuara gjatë ditëve të fundit nuk është gjetur akoma se nga janë infektuar.
“Ajo çka vihet re sidomos javën e kaluar është që kemi një tramsnetim më të përhapur në komunitet në lidhje me rastet me COVID-19. Nuk kemi të bëjmë vetëm më vatra të vogla familjare, apo shpërthime në komunitete të caktuara, por kemi të bëjmë edhe me shpërthime dhe identifikime rastesh për të cilët nuk gjendet burimi i infeksionit.”
Për Silva Binon, numri i testimeve është dyfishuar e trefishuar pas rihapjes. Sa i takon rastit të riinfektuar, ajo tha se kjo ka ndodhur pas tre muajsh. Sipas saj, pacienti është negativizuar me vështirësi.
