Nisma e qeverisë për të bërë me detyrim sigurimin nga banesat sjell në vëmendje tipologjinë e banesave që kemi në treg.
Të dhënat e Censit tregojnë se janë 730 mijë banesa të banuara që mund të jenë potencial për sigurimin nga tërmeti.
Diana Bardhi pedagoge në fakultetin e inxhinierisë së ndërtimit e ftuar në emisionin E-ZONE tha se mbështet idenë e një sigurimi me detyrim, por primi duhet të jetë i përballueshëm dhe i bazuar në analizë risku.
“Nuk mund të vazhdohet me idenë se shteti do të mbulojë çdo dëm që vjen nga fatkeqësitë natyrore. Ndaj ky sigurim është i domosdoshëm. Por shuma e sigurimit duhet të jetë e përballueshme. Ajo s’mund të jetë njësoj si për një pronë në Korçë dhe për një pronë në Tiranë. Por sot që flasim nuk kemi harta sizmike të rifreskuara që të na tregojnë saktë se kush janë zonat më me risk të lartë sizmik”, -tha Bardhi
Por në mbi 1 milion banesa të regjistruara nga censusi, më shumë se gjysma e tyre janë pallate të ndërtuara para viteve 90, që sipas Bardhit janë dhe më të riskuara nga tërmetet.
“Ne sot nuk kemi një studim të saktë të tipologjisë së ndërtimeve. Por ajo që mund të themi është se për shkak edhe të viteve kur janë ndërtuar, pallatet e para viteve ’90 mbeten më me risk të lartë. Por ndërkohë në dekadën 1990-2000 kemi ndërtime të kryera pa kriter, të pacertefikuara dhe të pakolauduara, pasi janë bërë nga “ustallarë” dhe në zona që nuk duhej ndërtuar. Edhe këto objekte që i përkasin kësaj dekade konsiderohen me risk sizmik”, -sqaroi Bardhi në Vizion Plus.
