Mazhoranca dhe opozita kanë arritur konsensusin sot në mbledhjen e komisionit për reformën zgjedhore. Deputetët kanë rënë dakord që t’i propozojnë Kuvendit, shtyrjen me 6 muaj të afatit të punës së këtij Komisioni.

 

Bashkëkryetari i këtij Komisioni Damian Gjiknuri lexoi emrat e dy ekspertëve teknik që iu atashuan këtij komisioni dhe nga tre ekspertë politikë për secilën palë.

 

Në fjalën e tij, deputeti Gjiknuri sqaroi se të gjithë ekspertët do të punojnë bashkë për të çuar përpara këtë reformë kaq të rëndësishme.

 

“Dy ekspertë teknik do bëjnë dhe atë facilitetin e nevojshëm, janë një lloj pike fokale ku mblidhet dhe informacioni dhe pastaj shpërndahet tek anëtarët e komisionit. Të gjitha vendimmarrjet natyrshëm do të merren këtu dhe s’ka bërë vaki që ekspertët politikë apo teknikë të caktojnë axhenda. Detyra që i kërkojmë ekspertëve dhe gjatë kësaj kohe kërkojmë programin e punës sipas temave dhe me një afat indikativ. Natyrshëm na takon ne për të mbajtur ritmin me qëllim që të realizojmë ato objektiva. Më vjen mirë që këtu kemi kolegë që kanë eksperiencë të mjaftueshme në të gjitha reformat zgjedhore dhe nuk është hera e parë. Kam përshtypjen që ne bashkë kemi qenë në të gjithë këto komisionet e reformave zgjedhore. Patjetër ekspertët janë të gjithë të barabartë, dhe vendimi i Kuvendit ka përcaktuar dhe ekspertë teknik dhe përfaqësues të partive politike. Jo të gjithë duan të identifikohen si ekspertë të partive politike”, tha Gjiknuri.

 

Anëtarja e komisionit Blerina Gjylameti i bëri apel përfaqësuesve të opozitës që të ecet përpara dhe të mos humbet kohë.

 

“Mendoj se kemi humbur mjaftueshëm kohë pa arritur të adresojmë problematikat reale”, nënvizoi Gjylameti.

Leave a Reply

Your email address will not be published.