Numri i bizneseve të regjistruar në Vlorë ka ardhur në rritje gjatë këtij tetëmujori. Sipas të dhënave nga drejtoria e Tatimeve në Vlorë, gjatë kësaj periudhe janë 731 subjekte të regjistruar, ndërsa prej muajit prill, ka pasur interes të lartë për riaktivizimin e biznesve.
“Përsa u përket subjekteve të riaktivizuara, në total janë 533 subjekte që përkojnë me biznese që kryesisht e zhvillojnë aktivitetin gjatë sezonit turistik. Kjo periudhë e riaktivizimeve është nga prilli e në vazhdim, kjo përkon edhe me sezonin turistik”, shprehet Ermal Pekmezi, drejtor i Tatimeve në Vlorë.
Kreu i Tatimeve në Vlorë konfirmon edhe interesin e të huajve për të hapur biznese në qytetin bregdetar.
“68 subjekte janë me administratorë të huaj. Kryesisht janë të orientuar oprdhimit, tregtisë, ndërtimit dhe shërbime konsulence, që përbëjnë numrin më të madh të këtyre subjekteve”, thotë ai.
Në vend të parë nga të huajt që kanë regjistruar një biznes në Vlorë janë italianët. /vizionplus.tv
