Shtëpia e Bardhë tha se vendosja e trupave evropiane në Groenlandë nuk e ndryshon planin e Presidentit të SHBA-së, Donald Trump, për të marrë në dorë ishullin Arktik.
“Nuk mendoj se trupat në Evropë ndikojnë në procesin e vendimmarrjes së presidentit ose në qëllimin e tij për marrjen e Groenlandës”, u tha zëdhënësja e Shtëpisë së Bardhë, Karoline Leavitt, gazetarëve të enjten, kur u pyet nëse njoftimet e fundit për dërgimin e trupave evropiane në terren do të ndikonin te Trump.
Këtë javë, disa vende evropiane, përfshirë Francën, Gjermaninë, Suedinë, Finlandën, Norvegjinë dhe Holandën, thanë se do të dërgonin trupa në Groenlandë për të marrë pjesë në një stërvitje ushtarake daneze, disa prej tyre janë tashmë atje.
Estonia gjithashtu “është gati të dërgojë trupa në terren nëse kërkohet”.
NATO nuk është e përfshirë në stërvitjen ushtarake, e cila është një stërvitje ndërqeveritare.
Presidenti amerikan ka kërcënuar vazhdimisht me përdorimin e forcës ushtarake për të pushtuar ishullin Arktik, të cilin ai pretendon se është në rrezik të bjerë në duart e Rusisë dhe Kinës.
Pas takimit me zëvendëspresidentin e SHBA-së JD Vance dhe Sekretarin e Shtetit Marco Rubio në Shtëpinë e Bardhë të mërkurën, ministri i jashtëm danez tha se Danimarka dhe Groenlanda “ende kanë një mosmarrëveshje themelore” me Uashingtonin.
Presidenti francez Emmanuel Macron u tha forcave të armatosura të vendit se Franca do të vendoste asete tokësore, ajrore dhe detare në Groenlandë në ditët në vijim.
“Franca dhe evropianët duhet të vazhdojnë, kudo që kërcënohen interesat e tyre, të jenë të pranishëm”, tha ai.
Mbretëria e Bashkuar dhe Norvegjia po mbështesin publikisht një përpjekje për të ngritur një mision të NATO-s të quajtur Arctic Sentry, i cili do të rriste ndikimin e aleancës.
