Kryeministri Rama ka mbajtur sot një konferencë të përbashkët me Marie Bjerre, Ministre e Çështjeve Europiane, Mbretëria e Danimarkës dhe Marta Kos, Komisionere Europiane për Zgjerimin.
Gjatë fjalës së saj, Kos vlerësoi progresin mbresëlënës të Shqipërisë në procesin e integrimit europian. Ajo nënvizoi se rezultatet janë fryt i punës së palodhur të institucioneve shqiptare dhe ritheksoi mbështetjen e BE-së për përmbylljen e negociatave brenda vitit 2027, duke e cilësuar të ardhmen e Shqipërisë si pjesë të pandashme të Bashkimit Europian.
Marta Kos: Shpejtësia e Shqipërisë është mbresëlënëse. Janë 5 grup-kapituj të hapur. Ka mbetur edhe një grup kapitull dhe jam e sigurt që do ta bëjmë këtë së shpejti. Ky rezultat është rrejdhojë e punës së madhe të autoriteteve shqiptare që kanë çuar përpara reformat.
E dimë që reformat që i kërkojmë kandidatëve tanë nuk janë të lehtea, kërkojnë ndryshime themeleore, por vendi juaj po tregon që ndryshimet mund të bëhen. BE-ja ju shpërblen, vijoni kështu. Në momentin që do të çelen të gjithë kapitujt, ne do të nisim të përmbyllim kapitujt sa më shpejt të jetë e mundur që të realizojmë ambicien tuaj për t’i përmbylluar ato brenda vitit 2027. E ardhmja e Shqipërisë është në BE dhe sot jemi një hap më pranë për ta arritur këtë objektiv./vizionplus.tv
