Kryeministri i vendit, Edi Rama ditën e sotme ishte i pranishëm në takimin e dytë të nivelit të lartë “Shqipëria 2030 në BE – Ruga e Reformave”.
Rama, gjatë fjalës së tij theksoi rëndësinë që ka integrimi i vendit në Bllok, pasi sipas tij BE është një perimetër sigurie dhe një domosdoshmëri për të garantuar lirinë individuale dhe sigurinë para ligjit.
Rama: Bashkimi Evropian është një perimetër sigurie brenda të cilit vendet dhe popujt që e përbëjnë ndihen dhe duan të mbeten të pakërcënuar në të gjitha ato që kanë arritur dhe mbi të gjitha në lirinë e tyre individuale dhe në barazinë e tyre para ligjit. BE është një krijesë e jashtëzakonshme politike. Për ne shqiptarët ka qenë më e thjeshtë dhe mbetet më e thjeshtë pse-ja e domosdoshmërisë së të qenit anëtare të BE-së. Për ne të qenit anëtar të BE-së është të qenit përfundimisht të lirë nga historia jonë, nga hija e historisë sonë dhe të qenit të sigurt se liria jonë individuale dhe barazia para ligjit nuk do të jenë më një atribut i lëvizshëm në varësi nga kush qeveris këtu në Shqipëri.
Rama vlerësoi punën e Komisionit të Posaçëm Antikorrupsion të drejtuar nga Fatmir Xhafaj. Objekti kryesor i Komisionit Antikorrupsion, që nga krijimi në maj të vitit të kaluar, ka qenë skanimi dhe reformimi i luftës ndaj korrupsionit dhe sundimi i ligjit në funksion të integrimit evropian të vendit.
Rama: Që në 27 maj kur komisioni ka nisur punën ne sot jemi në një nivel tjetër. Kemi hapur dy grup-kapituj të negociatave, kemi ambicien të hapim të tjerë në vijim dhe jemi pozicionuar më mirë se asnjëherë në të gjitha renditjet evropiane në fushën e mirëqeverisjes. Ne do të vazhdojmë të këmbëngulim në një pikë, konsolidimi i domosdoshëm i gjithçkaje që është në proces sepse gjithçka është ende e brishtë. Është ende vulnerabël dhe për këtë arsye nga duhet BE-ja. Me çdo kusht dhe me çdo çmim. Na duhet BE-ja, na duhet të hyjmë në atë derë që është hapur, është hapur me premisën që deri në fund të 2027 ne mund të mbyllim engociatat si një vullnet i dyanshëm dhe një derë që mund të mbyllet nëse ne nuk jemi të shpejtë për ta shfrytëzuar hapësirën e kohës që kemi në dispozicion. Historia tregon që ajo derë hapet dhe ajo derë mbyllet. Fatet e vendeve që duan të hyjnë në atë derë dhe të vendeve që janë pas asaj dere jo gjithmonë përputhen. Prandaj ne jemi shumë të bindur që ky komision, puna e të cilit do të vijojë edhe në legjislaturën e ardhshme do të mundësojë hyrjen në atë derë dhe qëndrimin aty./vizionplus.tv
