Ndarja nga jeta e nobelistit shqiptaro-amerikan Ferid Murad ka sjellë reagimin e akademikëve që kanë qenë pranë tij, duke vlerësuar punën e madhe të shkencëtarit në fushën e mjekësisë.
Ilia Mikarezi në një intervistë për “Vizionin e Pasdites” u shpreh se ndarja nga jeta e profesor Murad është një humbje e madhe jo vetëm për botën, por edhe për Shqipërinë. Ai tha se ai ka qenë pjesë e Akademisë së Shkencave për të dhënë kontributin e tij në kërkimet shkencore.
“Largimi i tij nga kjo jetë është një humbje për shkencën. Duke qenë se është një shqiptaro-amerikan, ne kemi dy fitues të Nobel Nënë Tereza dhe profesor Murad. Largimi nga jeta e këtij njeriu është një humbje edhe për Shqipërinë.
E tërë puna e tij shkencore është një vlerë e madhe. ASH natyrisht njerëz të tillë nuk mund ti lërë jashtë veprimtarisë së saj. Shumë shkencëtarë të tjerë janë pjesë e ASH me kontributin e tyre përmes shkencës”, tha Mikarezi.
Akademiku shtoi më tej se Murad është një model frymëzimi dhe që duhet ndjekur nga të gjithë, ku ka treguar që përmes këmbënguljes mund të arrijë shumë lart.
“Profesori është një model, që ashtu edhe shkencëtar të tjerë të këtij rangu ne duhet ti kemi parasysh për brezat e rinj. Është model i këmbënguljes. Jeta e tij është shumë interesante por edhe e vështirë që për të përballuar shpenzimet e shkollës i është dashur të bëjë dy punë. Këmbëngulja e tij është për tu admiruar”, tha akademiku.
Azis Pollozhani, akademik nga Maqedonia e Veriut, teksa ka vkerësuar figurën e nobelistit Murad, ka treguar edhe momentet nga takimi me të.
“Unë e kam takuar profesor Murad 3 herë në rrethana të ndryshme. Ai mbajti një ligjëratë përfaqësore për mjekët në Maqedoni që ishte një qasje moderne për shkencën dhe eksperimentet. Lajmi për humbjen e tij është humbje për shkencën, por edhe për ne që kemi pasur kontakte dhe na ka vizituar shpesh”, tha akademiku në një intervistë me Brikena Priftin në Vizionin e Pasdites.
Ferid Murad, me origjinë nga Gostivari, i lindur më 14 shtator 1936, ishte mjek dhe farmacist me famë botërore, i cili fitoi Çmimin Nobel për fiziologji dhe mjekësi në vitin 1998.
Një nga sukseset më të mëdha profesionale të Ferid Muratit është shpikja e Viagras, tashmë me famë në të gjithë botën.
