Shpërthimi tragjik në Lushnjë, babë e bir sapo kishin filluar punë, i riu ishte kthyer nga Italia

Një ngjarje e rëndë ndodhi ditën e premte në Lushnjë, ku për shkak të një shpërthimi në një kapanon, humbën jetën dy persona babë e bir si dhe u plagosën disa të tjerë, mes tyre edhe deputeti socialist Bujar Çela.

Burime bëjnë me dije se vinçi në të cilën ndodheshin babë e bir Roland dhe Elidon Hoxha ishte duke ngritur bombola oksigjeni. Në momentin që vinçi ka prekur telat e tensionit të lartë kanë shpërthyer bombolat e oksigjenit

Roland Hoxha 55-vjeç alias Landi Verçani (ka ndërruar identitetin për shkak të dokumentacionit), humbi jetën në vendngjarje, ndërsa djali i tij Elidoni ka ndërruar jetë ndërsa po transportohej drejt spitalit të Traumës në Tiranë.

Ndërkohë që i plagosur ka mbetur edhe deputeti Bujar Çela, i cili i është nënshtruar një ndërhyrjeje kirurgjikale, por sipas mjekëve është jashtë rrezikut për jetën.

Burime për Vizion Plus bënë me dije se Roland dhe Elidon Hoxha dje kishin filluar punë, ndërsa i riu sapo ishte kthyer nga Italia.

Në vendngjarje, përpos efektivëve të policisë mbërritën edhe ekspertët e Njësisë Antieksploziv, pasi në ambientet e kapanonit gjenden disa bombola, të cilat fatmirësisht nuk kanë shpërthyer. Shpërthimi i shkaktuar nga bombolat me oksigjen, të cilat ranë kontakt me rrymën elektrike gjatë transportimit me vinç ka shkaktuar dëme të konsiderueshme materiale, jo vetëm në ambientet e kapanoni, por edhe në bizneset përreth, pronarët e së cilëve shprehen se janë tronditur nga ngjarja.

Njoftimi i policisë për ngjarjen:

Rreth orës 16:05 në vendin e quajtur “Rrethrrotullimi i Plasmasit”, në një kapanon në ndërtim dyshohet se gjatë punës, një vinçier duke drejtuar një vinç, akisdentalisht ka prekur linjën e tensionit të lartë dhe për rrjedhojë ka ndodhur një shpërthim i fuqishëm.

Si pasojë e shpërthimit ka humbur jetën shtetasi L. V., dhe janë plagosur tetë shtetas mes tyre dhe deputeti B. Ç., të cilët ndodhen në spital për ndihmë mjeksore. /vizionplus.tv