Policia Rrugore vijon ndëshkimin e shoferëve që drejtojnë mjetin nën efektin e alkoolit, apo lëvizin me shpejtësi “skëterrë”, duke cenuar sigurinë e jetës në rrugë.
Gjatë 24 orëve të fundit, janë pezulluar 41 leje drejtimi, ndërsa janë gjobitur 1919 drejtues mjetesh.
Po ashtu, janë arrestuar 10 shoferë, nga të cilët 6 për drejtim mjeti në gjendje të dehur, si dhe 4 të tjerë, të cilët u kapën pa leje drejtimi.
“Falë denoncimeve nga qytetarët, në Komisariatin Dixhital dhe në numrin pa pagesë 112, në të gjithë vendin janë parandaluar 5 ngjarje të mundshme rrugore, në Tiranë, Korçë, Dibër, Sarandë dhe Fier, ku drejtuesit e mjeteve nën efektin e alkoolit xhironin gomat dhe kryenin manovra të rrezikshme në rrugë…Policia Rrugore apelon për të gjithë përdoruesit e rrugës në tërësi, veçanërisht drejtuesit e mjeteve, motomjeteve dhe çiklistët, që të tregojnë kujdes dhe të respektojnë rregullat e qarkullimit rrugor, si dhe fton qytetarët që të denoncojnë në Komisariatin Dixhital dhe në numrin e emergjencave 112, çdo paligjshmëri”, thuhet në njoftim.
