Të përdorura tashmë masivisht kryesisht nga të rinjtë për të shmangur trafikun e Tiranës, monopatinat elektrike janë kthyer në një rrezik të madh sa i takon numrit të aksidenteve, pasi këto mjete janë të përfshira sidomos gjatë këtij viti.
Sipas policisë, në 7% të numrit total të ngjarjeve rrugore, janë të përfshira biçikletat dhe monopatinat. Këto të fundit janë kthyer në një shqëtësim serion në rrugët e vendit për shkak të shpejtësisë që arrijnë dhe mungesës së respektimit të Kodit Rrugor nga drejtuesit e tyre.
“Gjatë periudhës së këtij viti, kryesisht motoçikletat dhe mjetet me pedal, pra ku hyjnë biçikletat dhe patinat elektrike, janë përfshirë 7% të aksidenteve. Ky vit po shënon një rritje të përfshirjes së këtyre mjeteve në aksidente rrugore. Kjo dhe për shkak të rritjes së përdorimit në numër të drejtuesve të këtyre mjeteve. Janë mbi 600 masa të vendosura për shkeljet e rregullave të drejtuesve të mjeteve me pedal”, tha polici Ali Yzeri.
Jo vetëm në qytet, por monopatinat po qakullojnë edhe në rrugët interurbane duke arritur shpejtësi tejet të lartë. Specialisti i Rrugores shprehet se këto mjete duhet të pajisen me leje drejtimi.
“Në rrugët interurbane është e ndaluar në mënyrë të rreptë, pra nuk i lejon ligji që ata të qarkullojnë në këto akse. Në zhargonin e përditshëm përdoret fjala monopatina elektrike, ato që ne i quajnë motora elektrikë. Kemi të bëjmë me motora elektrikë, pasi kalojnë shpejtësinë e vendosur si limit prej 25 km/h, pra mund të jenë 30, 40 ose 50 km/h. Për të gjithë këto kategori, Kodi Rrugor parashikon që ata duhet të pajisen me leje drejtimi”, tha Yzeri.
Edhe në spitalin e Traumës, mjekët shprehen se kohët e fundit është shtuar ndjeshëm numri i rasteve të pacientëve të aksidentuar gjatë drejtimit të monopatinave ku kanë patur fraktura të shumta dhe të rrezikshme./vizionplus.tv
