Kina ka vendosur sanksione kundër pesë prodhuesve amerikanë në shenjë hakmarrjeje për shitjen e fundit të armëve amerikane në Tajvan, tha sot në Pekin një zëdhënës i Ministrisë së Jashtme.
Shitjet e armëve nga Uashingtoni në Taipei janë një burim tensionesh të shpeshta me Pekinin.
Kina e konsideron Tajvanin provincën e saj. Qeveria aktuale e ishullit kundërshton qëndrimin kinez.
Sanksionet u shpallën disa ditë përpara mbajtjes së zgjedhjeve presidenciale dhe parlamentare në Tajvan të shtunën, më 13 janar.
Në dhjetor, Departamenti i Shtetit miratoi shitjet e pajisjeve me vlerë 300 milionë dollarë në Tajvan, veçanërisht për ta ndihmuar atë të mirëmbajë sistemet ushtarake të IT.
Për diplomacinë kineze, shitja e fundit “minon seriozisht sovranitetin kombëtar të Kinës dhe interesat e sigurisë kombëtare, rrezikon seriozisht paqen dhe stabilitetin në ngushticën e Tajvanit”.
Kompanitë që do të sanksionohen janë BAE Systems Land and Armaments, Alliant Techsystems Operations, AeroVironment, Viasat dhe Data Link Solutions.
Autoritetet në Pekin do të ngrijnë çdo burim të këtyre kompanive në juridiksionin e tyre dhe do të ndalojnë çdo person fizik ose juridik në Kinë të bëjë biznes me to, thuhet në deklaratën e Ministrisë së Punëve të Jashtme.
Ambasada e SHBA në Pekin nuk i është përgjigjur ende kërkesës së Reuters për koment mbi zhvillimin./vizionplus.tv
