Erjon Boba, 15 vjeç, i cili u godit me thikë nga një 14-vjeçar 9 ditë më parë në Durrës, ndërroi jetë në spitalin e Traumës më 4 dhjetor.
I mituri do të përcillet sot për në banesën e fundit, në vendlindjen e tij, në Bulqizë. Në lagjen ku familja Boba rrinte me qira, në zonën e ish Kënetës, banorët shprehen me dhimbje për ngjarjen e rëndë.
“Na erdhi shumë keq. Tragjedi shumë e rëndë. Duhen që të marrin masa, edhe shteti për të tjerët. Po ndodhin ngjarje të rënda shumë shpesh”, thotë një banor.
“Mësuesit duhet ta kontrollojnë fëmijën. Përgjegjësi më të madhe ka prindi. Gjë tjetër nuk dimë, si njerëz janë të mirë”, thotë një banore tjetër.
Edhe pronarja e shtëpisë, ku familja Boba banon me qira, shprehet se kjo ngjarje e rëndë ka ndodhur te një familje shumë e mirë, me të cilët ajo njihet prej vitesh.
“Djalë i urtë, i sjellshëm”, thotë ajo.
15-vjeçari u plagos me thikë në pjesën e gjoksit, pak pas mesditës së 25 nëntorit, vetëm 20 minuta në këmbë nga shkolla “Dom Nikollë Kaçorri”, ku mësonin të dy nxënësit e përfshirë në konflikt.
Burimet policore thanë se sherri nisi nga një koment në rrjetet sociale dhe ofendimeve të vazhdueshme në shkollë, të cilat më pas degraduan në plagosje me thikë.
Dyshohet se 15-vjeçari Erjon Boba e kishte marrë në telefon autorin 14-vjecar me iniciale M.K për të kërkuar sqarime, pasi kishte dëgjuar se ai e shante vazhdimisht në shkollë. Ata ranë dakord të takoheshin për tu sqaruar ku të pranishëm kanë qenë dhe shokë të tjerë të dy palëve, të cilët janë marrë në pyetja nga policia për ngjarjen e rëndë.
