Donald Trump mund të tërhiqet nga konflikti në Ukrainë, sipas deklaratave të djalit të tij të madh në një konferencë për Lindjen e Mesme.
Edhe pse Donald Trump Jr. nuk mban një pozicion zyrtar në administratën e babait të tij, ai mbetet figurë qendrore e lëvizjes MAGA dhe shpesh pasqyron mendimet e pjesës më konservatore të rrethit të Trump. Në fjalën e tij, ai kritikoi ashpër politikën e Ukrainës dhe drejtuesit e saj.
Trump Jr. i quajti “të korruptuar” oligarkët ukrainas, duke thënë se ata janë larguar nga vendi ndërsa “klasa punëtore” ka mbetur të luftojë. Ai akuzoi presidentin Volodymyr Zelensky se po e zgjat luftën për të shmangur humbjen në zgjedhjet e ardhshme dhe se mbështetja e vazhdueshme nga forcat e majta e ka shndërruar atë pothuajse në një “figurë të shenjtë”, ndërkohë që sipas tij Ukraina është “shumë më e korruptuar se Rusia”.
Sipas The Guardian, Trump Jr. kritikoi gjithashtu shefen e politikës së jashtme të BE-së, Kaja Kallas, duke argumentuar se sanksionet kundër Rusisë rritën çmimin e naftës dhe i mundësuan Moskës të financojë luftën. “Strategjia e Evropës është të presë derisa Rusia të falimentojë kjo nuk është strategji,” tha ai.
Duke iu rikthyer fushatës së vitit 2022, ai deklaroi se vetëm tre persona e panë luftën në Ukrainë si një çështje kryesore. Sipas tij, hyrja e drogës nga Venezuela është “një kërcënim shumë më i menjëhershëm” për SHBA sesa lufta në Ukrainë.
Trump Jr. po ashtu pretendoi, pa paraqitur prova, se këtë verë në Monako kishte vënë re që gjysma e veturave superluksoze, si Bugatti dhe Ferrari, mbanin targa ukrainase. “A mendoni se i kanë fituar në Ukrainë këto makina?” u shpreh ai me ironi.
I pyetur nëse është e mundur që Donald Trump i cili ka premtuar se do të sillte paqe në Ukrainë të tërhiqej krejtësisht nga konflikti nëse rizgjidhet, ai u përgjigj se kjo është e mundur, duke theksuar se i ati është “njëri prej politikanëve më të paparashikueshëm”. Sipas tij, SHBA nuk do të jetë më “budallai me çekun e hapur” në raport me ndihmën për Ukrainën.
/vizionplus.tv
