Ambasada amerikane në Prishtinë ka rikonfirmuar qëndrimin e Uashingtonit ndaj qeverisë së kryeministrit në detyrë Albin Kurti, për ndërprerjen e dialogut strategjik.
Në përgjigje të interesit të mediave, ambasada ka theksuar se SHBA kërkojnë në Kosovë një partner të përkushtuar, që kupton nevojën për të shmangur veprimet destabilizuese, të avancojë stabilitetin rajonal dhe të mbrojë të drejtat e të gjithë qytetarëve të vendit.
Përfaqësia diplomatike ka sqaruar gjithashtu se shqetësimet i janë shprehur drejtpërdrejt edhe vetë kryeministrit Kurti nga e ngarkuara me punë, Anu Pratipati.
Ndërkohë, ish-ndihmës sekretari amerikan i Shtetit, James Rubin, ka treguar gjatë seancës në Hagë për takimet me ish-presidentin e Kosovës.
Sipas Rubinit, Thaçi nuk kishte autoritet të plotë për të diktuar rregulla dhe kushte brenda UÇK-së, duke u detyruar të konsultohej me persona të tjerë për miratimin e vendimeve. Ai tha se disa nga këta persona i konsideronte “ekstremistë”, të cilët, sipas tij, kërkonin veprime të menjëhershme, ndërsa Thaçi kishte një qasje më pragmatike.
Për të diskutuar më shumë mbi zhvillimet në Kosovë, analistja e njohur Alma Lama ishte në një lidhje të drejtpërdrejtë në Edicionin Qendror të Lajmeve në Televizionin Kombëtar Vizion Plus me moderator Aleksandër Furxhi.
Znj. Lama tha se ky lajm i keq për Kosovën nuk është i papritur, pasi, siç deklaroi analistja, ka pasur gjithmonë tërheqje vëmendjeje nga SHBA-të. Alma Lama deklaroi se pjesa më e madhe e publikut e shohin me shqetësim këtë zhvillim negativ në raport me SHBA.
Sa i përket dëshmisë së James Rubinit, analistja e cilësoi si një lloj drite në gjithë atë errësirë të zhvillimit të procesit në Hagë.
INTERVISTA E PLOTË:
Një opinion se çfarë shënon ky zhvillim? Është një ngjarje e pazakontë, e padëgjuar më parë midis Prishtinës dhe Uashingtonit.
Lama: Është një lajm i keq për Kosovën, por jo i papritur. Ka pasur gjithmonë tërheqje vëmendjeje nga SHBA-të. U bë më shumë se dy vite që lëshohen komunikata për shqetësimin e tyre në lidhje me veprimet që merr qeveria e Kosovës. Sidomos me veprimet në veri, duke shkaktuar tensione. Dhe po ashtu veprimi më i fundit që lidhet me Kuvendin e Kosovës. Dhe sidomos pastaj që ka pasur sulme ndaj Gjykatës Kushtetuese, nga eksponentë të Lëvizjes Vetëvendosje, gjë që ka çuar edhe tek kjo deklaratë. Kurtin nuk e konsiderojnë më partner, por e shohin si një rrezik për destabilizimin e Kosovës dhe të rajonit.
Si mendoni ju, opinioni publik në Kosovë si e sheh këtë qëndrim të Uashingtonit?
Lama: Opinioni publik është i ndarë, janë mbështetësit e Vetëvendosjes që nuk e shohin si të drejtë këtë lloj vërejtjeje. Por, pjesa më e madhe mendoj se e shohin me shqetësim këtë zhvillim negativ në raport me SHBA. Do mbetet për t’u parë se cili opinion do të mbizotërojë. Sigurisht që ky nuk është vendim përfundimtar nga SHBA. Një qasje tjetër nga ana e përfaqësuesve të institucioneve të Kosovës mund ta ndryshojë qasjen e tyre.
Kemi dhe sanksionet e BE që janë ende në fuqi. Cila është perspektiva e Albin Kurtit dhe Lëvizjes Vetëvendosje?
Lama: Kosova përveçse nën sanksione të BE është edhe nën sanksione të SHBA. Kjo politikë konfliktuese me partnerët është vërtetë vrasëse për Kosovën dhe politikën e saj. Kosova është e bllokuar prej zgjedhjeve të 9 shkurtit, ku problemi mbetet Lëvizja Vetëvendosje që nuk ka mbledhur vota të mjaftueshme për ta themeluar qeverinë. Unë pres zhvillime të tjera dhe kam përshtypjen që kjo gjuhë e përdorur edhe nga ambasada amerikane dhe Departamenti i Shtetit është paralajmërim për një sjellje goxha të rrezikshme.
Sot ka dëshmuar Rubin. Si e ndjek opinioni publik në Kosovë këtë fazë të procesit dhe qëndrimin ndaj komandantëve të UÇK?
Lama: Dëshmia e Rubinit ishte si një lloj drite në gjithë atë errësirë të zhvillimit të procesit në Hagë. Rubini, një diplomat i shquar, i përfshirë në çdo hap të luftës në Kosovë, hodhi dritë në shumë aspekte, ku kryesorja ishte për të vërtetuar rolin e kreut të UÇK-së, Thaçit. Ai hodhi dritë duke thënë që zoti Thaçi nuk i merrte vendimet vetë. Pra shkarkoi përgjegjësinë nga Thaçi dhe të tjerët që ishin aty. Në Kosovë është ndjekur me interes të jashtëzakonshëm.
/vizionplus.tv
