Një urim i veçantë për Kosovën në 15 vjetorin e saj të pavarësisë erdhi nga sekretari amerikan i Shtetit, Antony Blinken.
Ai është shprehur se pret vazhdim të bashkëpunimit për forcimin e sigurisë dhe stabilitetit në Kosovë dhe Ballkanin Perëndimor.
“Normalizimi i marrëdhënieve me Serbinë, me njohjen reciproke në qendër, është thelbësor për këtë gjë. Marrëveshja e propozuar së fundmi, në kuadër të dialogut të ndërmjetësuar nga Bashkimi Europian, e ka mbështetjen tonë të madhe dhe ajo do të drejtojë shtetin tuaj drejt një stabiliteti më të madh rajonal dhe integrimeve evropiane e euro-atlantike”
Presidenti i Francës, Emanuel Macron, uroi homologen e tij Vjosa Osmani me një letër, ku nënvizohet mbështetja për Kosovën në përpjekjet e saj për forcimin e sundimit të ligjit.
Në mesazhin e tij, mbreti Charles i Britanisë shkruan se pret me padurim vazhdimin e miqësisë së ngrohtë dhe partneritetit të fortë mes Kosovës dhe Mbretërisë së Bashkuar.
Po ashtu presidenti italian, Sergio Matarella, ka uruar që propozimi europian për marrëveshje ndërmjet palëve të mund të pranohet, pasi sipas tij ajo është në dobi të perspektivës së Kosovës për integrim europian.
Presidentja Osmani ka marrë një letër urimi edhe nga presidenti gjerman, i cili ka përmendur angazhimin e Kosovës për vlerat europiane dhe në këtë kontekst ka përshëndetur partneritetin në raport me luftën e paprovokuar të Rusisë në Ukrainë.
