Zëvendëskryeministri Erjon Braçe reagoi pas akuzave të demokratëve se ndaj punonjësve të administratës po ushtrohet presion për të mbledhur vota për PS. Duke marrë shkas nga një formular i publikuar sot nga PD, që sipas saj qarkullon në administratë, Braçe kërkoi që të dalë një demokrat i vetëm dhe të dëshmojë që këto fjalë janë të vërteta.
“Prej mëngjesit të sotëm, duke nisur nga një njeri që shantazhon administratën vendore për përfitime banale kriminale edhe në oborr të institucioneve dhe, vijuar me një udhëheqës që rikthen fuksat e partisë së qëmotit në aktivitet kriminal ndaj administratës kudo, #PARTIAELYLIT ka rritur trysninë kriminale, publike ndaj nëpunësve të shtetit! Sorollasin një letër pa shenja identifikuese të çdo lloji, të cilën mund ta bëjë kushdo, pra edhe ata vetë, si provë e angazhimit të administratës në “një skemë të vjedhjes së votës”; Veçanërisht kur thonë se kjo letër u është dhënë këshilltarëve bashkiakë që nuk janë “administratë”, por të zgjedhur politikë me votë! Si kjo letër gjen në Google dhjetëra të së njëjtës formë, tepke, të cilat PD i ka bërë çdo palë zgjedhje. E SFIDOJ #PARTIAELYLIT TË NXJERRË NJË PEDEIST TË VETËM NË ADMINISTRATË-DHE KA SHUMË TË TILLË, TË THOTË QE E KA THIRRUR NJË EPROR, I KA KËRKUAR DHUNSHËM ANGAZHIM ME PS DHE I KA DHËNË NË DORË KËTË LETËR! NJË PEDEIST TË VETËM, PUBLIKISHT!”
Braçe theksoi se aktiviteti politik i administratës është i ndaluar. Ai garantoi se qeveria do të mbrojë çdo nëpunës që shatanzhohet për votën me vendin e punës. Këtë të premte, Gazment Bardhi vuri në lëvizje degët e PD për të monitoruar drejtorët dhe punonjësit e administratës.
