Drejtori i Rendit Publik në Policinë e Shtetit, Albert Dërvishi, ka treguar masat që kanë marrë uniformat blu për sigurinë gjatë sezonit turistik 2021.
Sipas Dërvishit, Policia e Shtetit, do të jetë me forcat e saj, në të gjithë territorin bregdetar të vendit, për të garantuar qetësi për pushuesit. Ai tha gjithashtu, se nisma “Bregdeti Ynë” është në fazën e dytë të saj dhe ka si qëllim lirimin e zonave të zëna nga ndërtime pa leje.
Më tej, ai shtoi se për shkak të ardhjes së pushuesve vendas dhe të huaj janë angazhuar mbi 1000 policë të sektorëve të ndryshme që kanë në mbështetje mjetet që do t’i shërbejnë rritjes së gatishmërisë, ndërsa theksoi se në plazhe do të patrullojnë efektivë policie për t’i ardhur në ndihmë pushuesve.
Po ashtu, ai apeloi lokalet që të zbatojnë masat e vendosura nga Komiteti Teknik, duke argumentuar, se muzika ndalohet pas orës 22:00 dhe lokalet duhet të mbyllen pas orës 00:00.
“Policia e Shtetit, në përmbushje të misionit dhe të detyrave të saj institucionale, do të ushtrojë kontrolle të pandërprera dhe do të marrë masa në vlerësim edhe të shqetësimeve të ngritura nga pushuesit në zonat bregdetare apo nga banorët në qendrat e banuara, duke ndëshkuar çdo subjekt që nuk ndalon muzikën sipas orarit të përcaktuar ose gjeneron zhurmë tej normave të lejuara, në qendrat urbane, zonat turistike dhe ato bregdetare. Në këtë kuadër, Policia e Shtetit apelon që të gjitha institucionet që ligji i ngarkon me detyra në këtë drejtim, si dhe subjekteve për bashkëpunim gjatë sezonit turistik. Policia Kufitare dhe punonjësit e Policisë së Rendit të planëzuar me shërbim në zonat bregdetare, do të evidentojnë, bllokojnë dhe ndëshkojnë çdo shtetas që keqpërdor mjetet lundruese apo motorët e ujit, duke u bërë rrezik i shtuar për jetën e shtetasve të tjera që argëtohen në det apo pushojnë në plazh, duke bashkëpunuar me njësitë e pushteti vendor dhe kapiteneritë e porteve, me qëllim parandalimin e ngjarjeve me pushuesit në det. Me qëllim rritjen e besimit të publikut ndaj Policisë, është kërkuar nga punonjësit e Policisë së Shtetit, që të zbatojnë kërkesat e Kodit të Etikës në komunikim me shtetasit shqiptarë dhe të huaj dhe të jenë të papajtueshëm jo vetëm me sjellje jo etike, por edhe me veprime të tjera të cilat do të cenonin imazhin e policisë në publik dhe më keq akoma, do të përbënin akte korruptive dhe të dënueshme penalisht.”
