Policia e Mirditës, në bashkëpunim me Drejtorinë Vendore të Policisë Lezhë, ka finalizuar me sukses operacionin antidrogë të koduar “Green Harvest”, duke goditur një rast të tentativës për shitje të lëndës narkotike Cannabis Sativa.
Gjatë operacionit të zhvilluar mbrëmjen e kaluar, në aksin rrugor Shpal – Blinisht, policia tentoi të ndalonte dy automjete të dyshuara. Sapo kanë konstatuar praninë e policisë, tre shtetas kanë braktisur mjetet dhe janë larguar në këmbë, duke përfituar nga errësira dhe terreni i thyer malor.
Nga kontrolli në automjete, u sekuestruan 5 thasë me lëndë të dyshuar narkotike Cannabis Sativa, me një peshë totale prej 38.8 kilogramësh, si dhe vetë dy automjetet.
Në vijim të hetimeve, janë identifikuar dhe shpallur në kërkim tre shtetas:
- D. R., 40 vjeç
- D. R., 35 vjeç (vëllezër), banues në Krujë
- M. Sh., 27 vjeç, banues në Fushë Arrëz, Pukë
Dyshohet se këta persona siguronin lëndë narkotike me qëllim ndarjen dhe shpërndarjen e saj në sasi të vogla në qytet.
Materialet procedurale i janë referuar Prokurorisë pranë Gjykatës së Juridiksionit të Përgjithshëm Lezhë, për veprime të mëtejshme, në kuadër të veprës penale “Prodhimi dhe shitja e narkotikëve”, kryer në bashkëpunim.
/vizionplus.tv
