Sekretari amerikan i Mbrojtjes, Pete Hegseth, thotë se “ne duhet ta bëjmë NATO-n përsëri të madhe” ndërsa u bën thirrje aleatëve të bëjnë “shumë më shumë për mbrojtjen e Evropës”.
Duke folur pas takimit me homologët evropianë, Hegseth thotë se i është dhënë një “mision i qartë” nga Donald Trump për të “arritur paqen përmes forcës, si dhe për të vënë Amerikën në vend të parë“.
Ai shpjegon se kjo po bëhet duke “ringjallur moralin e luftëtarit, duke rindërtuar ushtrinë tonë dhe duke rivendosur frenimin”.
Sekretari amerikan i Mbrojtjes foli edhe për luftën Ukrainë-Rusi, ku tha se marrëveshja e paqes do të duhet të përfshijë disa elementë që asnjëra palë nuk dëshiron, por kufijtë nuk do të kthehen aty ku ishin në vitin 2014, kur Rusia aneksoi në mënyrë të njëanshme Krimenë.
Në të njëjtën kohë, ai deklaroi se Presidenti Trump kishte kontaktuar presidentët Putin dhe Zelensky në fillim të kësaj jave, duke shtuar se “të gjitha negociatat do të zhvillohen me pjesëmarrjen e të dyve”.
