Zhvillimin në Tiranë të Samitit mes liderve të Bashkimit Evropian dhe Ballkanit Perëndimor, kryeministri Rama e quan një ditë historike.
Kreu i qeverisë shkruan në rrjetet sociale, se për kryeqytetin është ngjarja më e madhe ndërkombëtare.
Për vitin 2022, Samiti i BE-së është “qershia mbi tortë” pas finales së UEFA Conference League, shkruan rama.
Kryeministri vlerëson se për qeverinë që ai drejton Samiti i 6 nëntorit është rezultati i përpjekjeve të Shqipërisë në rrugën e anëtarësimit në BE.
Sot, thotë kryeministri, Tirana është kryeqyteti i një vendi të respektuar në politikën ndërkombëtare.
Kjo është hera e parë që liderët kryesorë të Evropës mblidhen në Shqipëri për të diskutuar për të ardhmen e gjashtë vendeve të Ballkanit në familjen evropiane.
“BE-ja NE TIRANE
Presidenti i Këshillit Europian, Charles Michel, ka bërë publik vendimin e mirëseardhur për organizimin më 6 dhjetor, në Tiranë, të Samitit BE-Ballkani Perëndimor.
Nuk besoj se mund ta imagjinonte kush deri disa vite më parë, që tërë liderat e BE-së do të zbrisnin në Tiranë, për një punë që gjithnjë është bërë në Bruksel. Por sot Tirana nuk është më ajo e deri disa viteve më parë, po është kryeqyteti i një vendi të respektuar në politikën ndërkombëtare, si edhe një qytet i ri europian tërheqës për zhvillimin e tij mbresëlënës.
Për historinë e marrëdhënieve ndërkombëtare të Shqipërisë kjo është një ngjarje absolutisht historike. Për Tiranën kjo është ngjarja më e madhe ndërkombëtare e historisë së saj. Për vitin 2022 që po shkon drejt përfundimit, kjo ngjarje është qershia mbi tortë pas kulmit të bukur të Finales së UEFA Conference League në shtëpinë e kuqezinjve. Ndërsa për mua dhe qeverinë shqiptare, organizimi në Tiranë i një samiti të liderëve të Bashkimit Europian&Ballkanit Perëndimor është fruti më i bukur, i përpjekjes për afirmimin e Shqipërisë, si një zë i respektuar dhe anëtar dinjitoz i bashkësisë ndërkombëtare”, shkruan Rama.
