Kryetari i Gjykatës së Lartë, Sokol Sadushi, ka kërkuar zhbllokimin e menjëhershëm të pagave të gjyqtarëve dhe administratës gjyqësore, duke e cilësuar situatën si një çështje që prek drejtpërdrejt pavarësinë e gjyqësorit dhe rendin kushtetues.
Në mbledhjen e jashtëzakonshme të gjyqtarëve të Republikës, Sadushi deklaroi se bllokimi i pagave pas vendimit përfundimtar të Gjykatës Kushtetuese nuk mund të trajtohet thjesht si një problem financiar apo administrativ.
“Pavarësia jonë nuk matet vetëm kur marrim vendime të vështira, por matet edhe në mënyrën si reagojmë kur vetë institucioni vihet në vështirësi”, u shpreh Sadushi, duke theksuar se gjyqësori duhet të reagojë në mënyrë të përbashkët, institucionale dhe brenda kuadrit kushtetues.
Sipas tij, nuk bëhet fjalë për një përplasje mes gjyqësorit dhe ekzekutivit, por për respektimin e një vendimi përfundimtar të Gjykatës Kushtetuese.
“Nuk është garë force ndërmjet pushteteve, por provë e forcës së Kushtetutës mbi secilin prej tyre”, tha kryetari i Gjykatës së Lartë.
Sadushi ngriti pikëpyetje edhe mbi mënyrën se si duhet të trajtohen pagat pas datës 31 korrik 2026, kur përfundoi afati për ndryshimet ligjore. Ai argumentoi se një normë e shfuqizuar nga Gjykata Kushtetuese nuk mund të rikthehet përmes mosveprimit dhe se mungesa e një rregullimi të ri nuk mund të çojë në pezullimin e garancisë kushtetuese për pagën e gjyqtarëve.
“E drejta e gjyqtarit për pagë nuk lind nga buxheti. Ajo buron nga Kushtetuta dhe ligji”, deklaroi Sadushi, duke shtuar se nëse fondet nuk janë planifikuar, zgjidhja duhet të jetë rishpërndarja apo rishikimi i buxhetit dhe jo pezullimi i detyrimeve.
Një pjesë të veçantë të fjalës së tij ai ia kushtoi administratës gjyqësore, e cila, sipas tij, ka mbetur pa paga pavarësisht se punonjësit nuk janë palë në konfliktin institucional.
“Administrata gjyqësore nuk mund të mbajë pasojat e një mosmarrëveshjeje që nuk e ka krijuar”, u shpreh ai, duke kërkuar që pagat e punonjësve të zhbllokohen menjëherë.
Sadushi theksoi se pagat nuk mund të përdoren si instrument për të ndikuar mbi gjyqësorin dhe se kjo garanci nuk mbron vetëm gjyqtarët, por edhe qytetarët që presin një drejtësi të pavarur.
“Nuk mund t’i kërkosh gjyqtarit pavarësi dhe ta trajtosh statusin e tij si të negociueshëm”, tha ai.
Në përfundim, kryetari i Gjykatës së Lartë kërkoi ekzekutimin e detyrimeve financiare të prapambetura, përfshirë diferencat që lindin deri në hyrjen në fuqi të ligjit të ri, si dhe zgjidhjen e çdo mosmarrëveshjeje përmes mjeteve kushtetuese dhe ligjore.
“Kushtetuta nuk negociohet. Vendimi përfundimtar nuk negociohet. Ai zbatohet”, deklaroi Sadushi.
Ai bëri thirrje për respektimin e ndarjes së pushteteve dhe për rikthimin e dialogut institucional, duke theksuar se nga një konflikt mes institucioneve nuk fiton askush.
“Humbet qytetari, humbet drejtësia dhe, në fund, humbet vetë shteti”, përfundoi kryetari i Gjykatës së Lartë.
