Teksa na ndajne edhe 7 ditë nga dita e zgjedhjeve, kreu i Bindjes Demokratike, Astrit Patozi iu ka bërë apel qytetarëve që të shkojnë e të votojnë në 25 prill.
Në mesazhin e përçuar, Patozi vë theksin tek rëndësia e ditës së votimit, të cilën e quan një lojë shumë serioze.
“Sado i mërzitur të jesh me kënetën politike, nuk e ke luksin të qëndrosh të shtëpi”, nënvizon kryetari i BD-së.
“TI NUK E KE LUKSIN TË QËNDROSH NË SHTËPI. Voto me zemër, por duke vënë në punë arsyen. Zgjedhjet nuk janë një ndeshje futbolli, për të cilën emocionet zgjasin vetëm 90 minuta. Ato janë një lojë shumë serioze, ku gabimi kushton të paktën 4 vjet. Shqipërinë nuk e ndryshojnë dot fanatikët e partive, jo vetëm për faktin se janë pak. Por mbi të gjitha se ata kryesisht janë masha e kryetarëve të përjetshëm për ta ruajtur të paprekur mbretërinë e korrupsionit, arrogancës, padrejtësisë dhe abuzimit me pushtetin. Sado i mërzitur të jesh me kënetën politike, nuk e ke luksin të qëndrosh të shtëpi. Ti nuk mund t’ua dorëzosh të ardhmen e familjes tënde atyre, që do të gëzohen nga mungesa jote në zgjedhje. Ndiq bindjen tënde dhe do të kuptosh se 3 të parët, që sundojnë prej shumë vitesh Shqipërinë, janë njësoj. Ndaj voto numrin 4, Bindjen Demokratike!”
